«Ozodlik»ning navbatdagi ig‘vosi: Mingbuloqda, aslida, nima bo‘lgan edi?

«Ozodlik»ning navbatdagi ig‘vosi: Mingbuloqda, aslida, nima bo‘lgan edi?

2019 yilning 11 iyul sanasida “Ozodlik” saytida e’lon qilingan “Andijondagiga o‘xshagan “uy operasiyasi” bir yil avval Namanganda ham o‘tkazilgani ma’lum bo‘ldi” nomli material e’lon qilindi. Bu haqda "namanganliklar.uz" yozmoqda.

Hech qanday huquqiy asos, faktlarga ega bo‘lmagan, bo‘hton, g‘iybat va ig‘volarga qorishilgan ushbu “maqola” yuzasidan Mingbuloq tumani hokimligi o‘z munosabatini bildirdi. Unda jumladan shunday deyiladi:

Xalq roziligi va aholi turmush farovonligi ustuvorligida O‘zbekistonda olib borilayotgan ijtimoiy siyosatni yolg‘onga chiqarishga, mahalliy hokimiyatlarning joylarda aholining muammolarini hal etish borasida olib borayotgan harakatlarini salbiy talqinda yoritishga urinilgan bu maqolada Namangan viloyat, Mingbuloq tumanida 2018 yilning avgustida 7 nogironga tantanali topshirilgan yangi uy kalitlari tadbirdan so‘ng olib qo‘yilgani, nogironlar esa hokimiyat balansidagi sharoitsiz eski uylarga joylashtirilgani ta’kidlangan.

Mingbuloq tumanida yashovchi nogironlar Farida Mamarizayeva, Shahnoza Rasulova va Nigora Samiyeva nomidan qayta qayta “nogironlarga yangi uy berib, sertifikat va kalitlari topshirilgani, biroq kalitlarni o‘sha kuniyoq tortib olib qo‘yishgani” keltirilgan.

Aslida, 2018 yilda Mingbuloq tumanida yashovchi, uy-joy ehtiyoji bo‘lgan nogironlardan 7 nafariga tuman hududidan yashash uchun moslashtirilgan binolardan bepul uy-joy taklif etilgan, ularning roziligi berilgan ob’ektlar bo‘yicha ta’mirlash ishlari olib borib, yashash uchun sharoitlar yaratilgan.

Yuqorida qayd etilgan sana, 2018 yilning avgustida ularga (7 nafar nogironga) To‘raqo‘rg‘on tumanida o‘tkazilgan tadbirda “Mustaqilligimizning 27 yilligi munosabati bilan viloyatdagi og‘ir iqtisodiy ahvolga tushib qolgan xotin-qizlarga, nogironligi bo‘lgan, kam ta’minlangan, farzandlarini to‘liqsiz oilada tarbiyalayotgan va uy-joy sharoitini yaxshilashga muhtoj onalarga uy-joy topshirish to‘g‘risidagi Sertifikat” bilan o‘sha o‘zlari avvaldan qabul qilgan uylarning ramziy kalitlari topshirilgan.

Ularga yangi qurilayotgan namunaviy uylardan ajratilgani, bu uylarning sertifikati topshirilgani, keyin olib qo‘yilgani to‘g‘risida “Ozodlik” saytida keltirilgan bayonot to‘laligicha uydirmadir.

“Ozodlik” materialida ismi keltirilgan nogironlardan Farida Mamarizayevaga, 2018 yilda MFY binosidagi uchastka inspektori xizmat uyi taklif etilgan va avvaldan bu yerda yashashga rozi bo‘lib, sertifikat topshirish marosimidan so‘ng yashash fikridan qaytgan. Keyinchalik unga taklif etilgan yana ikki binoni rad etgach, yashash uchun moslashtirilgan eski QVP binosidagi 5 xonadondan o‘z tanlovi bilan birini tanlab olgan. Unga ajratilgan yashash hududiga kanalizasiya hamda suv ta’minoti o‘tkazib berilgan. Uning yonida yashovchilar orasida pichoq ko‘taradigan erkak qo‘shnilar hamda sigaret chekuvchilar yo‘qligi, faqat ayollar yashashi ma’lumot uchun keltirish joiz deb topildi.

“Ozodlik” saytida nomi keltirilgan Shahnoza Rasulova va Nigora Samiyeva, ular nomidan “katta tadbirda go‘yo biz nogironlarga yangi uy topshirishdiyu, aslida esa eski uyga olib kelib, tiqib qo‘yishdi” degan gapning g‘irt bo‘hton ekanini ta’kidlashdi. Yaratilgan sharoitlardan, tuman hokimligi, xotin-qizlar qo‘mitasi hamda MFY tomonidan berilayotgan e’tibor yuzasidan o‘z minnatdorchiliklarini takrorlashdi. “Ozodlik”ning nima ekanini ham bilmasligini, qo‘ng‘iroq bo‘lgach, “yana qaysidir idora mening muammolarimni yechish uchun jon kuydirmoqda” deb o‘ylagan Shahnoza Rasulova, kunlik mavjud muammolarini aytganini, biroq materialda keltirilgan gaplarning yarmi unga oid bo‘lmaganini, uydirma ekanini aytdi. Mahalliy hokimiyat tomonidan sovg‘a etilgan tikuv mashinasi bilan qo‘shni mahallada bepul asosda berilgan binoda xususiy chevarchilik bilan mashg‘ul Rasulova, endi uyi yaqinidan unga bepul ishxona uchun joy taklif etilganini, yaqin davrda tikuvchilik xonasini ko‘chirib o‘tishini ma’lum qildi. O‘z qo‘lida yashayotgan joyi uchun kadastr hujjatlari mavjud bo‘lgan, biroq buning qabul qilinishi uchun asos bo‘lgan tuman hokimining qarori nusxasi qo‘lida bo‘lmagani uchun, buning yetarli mulk huquqi bermasligini o‘ylab, bu haqda “Ozodlik”ning telefonda bog‘langan xodimiga gapirganini aytdi.

“Bo‘yga yetgan o‘g‘li bilan hojatxonasi yo‘q uyda yashayotgani” iddao etilgan Nigora Samiyeva, u bilan hech kim “Ozodlik” nomidan muloqot qilmaganini, o‘z yashash sharoitlaridan juda mamnun ekanini, ularga o‘rab berilgan hovlining shundoq 3-4 metr tashida tualet borligi uchun, unga uy berilgan paytda qazilgan tualetni ko‘mib, devorlari uchun mo‘ljallangan g‘ishtni uyib qo‘yganini, biroq endi hovlining boshqa burchagidan tualet kavlashni reja qilayotganini, 20 dan oshgan o‘g‘lining yozda ustachilik qilayotgani va buyurtmalari ko‘p ekanini, shunga vaqti yetmayotganini bildirdi.

Mingbuloq tumani hokimligi dunyoda so‘z hamda fikr erkinligini ta’minlash borasida olib borilayotgan keng ko‘lamli ishlarni qo‘llab-quvvatlaydi. Bu borada har qanday xolis va konstruktiv tanqid, mavjud muammolarni hal etishga ko‘maklashishi shubhasiz. Biroq, matbuot nashri sifatida axborot maydonida ish olib boruvchi har bir media, o‘z faoliyatida bo‘hton va uydirma orqali o‘z g‘arazli maqsadlarini amalga oshirishga intilishini qoralaymiz. “Ozodlik”ni ham o‘z materiallarini aniq fakt va xolis yondashuv bilan tayyorlashga chorlaymiz.

Mingbuloq tumani hokimligi.


Matnda xatolik topsangiz, o‘sha xatoni belgilab, bizga jo‘nating (Ctrl + Enter)

Bo'limga tegishli qiziqarli xabarlar

Fikr bildirish uchun qaydnomadan o'tishingiz so'raladi va telefon rakamni tasdiklash kerak buladi!