OpenAI'ning 700 dan ortiq xodimi direktorlar kengashi iste’foga chiqmasa, Microsoft'ga o‘tish bilan tahdid qildi
ChatGPT'ni ishlab chiquvchi OpenAI kompaniyasining deyarli barcha xodimlari kompaniya asoschilaridan biri Sem Altmanni bosh direktor lavozimidan bo‘shatishga qaror qilgan direktorlar kengashi tarkibini o‘zgartirishni talab qilgan xatga imzo chekishdi.
“Bloomberg” xabariga ko‘ra, xatni imzolagan 770 OpenAI xodimining 700 dan ortig‘i direktorlar kengashi iste’foga chiqmasa va Altman qayta tiklanmasa, ishdan bo‘shab, kompaniyaning asosiy investori – Microsoft kompaniyasiga ishga borish bilan tahdid qilgan.
Xatda aytilishicha, ular kompaniyaning missiyasi va xodimlari uchun "etarli malakaga, mulohazaga va tashvishga ega bo‘lmagan odamlar uchun ishlay olmaydilar".
“Microsoft bizni barcha OpenAI xodimlari uchun bo‘sh ish o‘rinlari mavjudligiga ishontirdi”, deyiladi bayonotda.
Dastlab maktubni 500 dan ortiq xodim imzolagani xabar qilingan edi, keyin “Bloomberg” murojaatni 700 dan ortiq kishi qo‘llab-quvvatlaganini aniqladi.
Xatni imzolaganlar orasida Sem Altmanni ishdan bo‘shatishda ishtirok etgan OpenAI asoschilaridan biri va direktorlar kengashi a’zosi Ilya Sutskever ham bor. Sutskever 20-noyabr kuni "direktorlar kengashining harakatlarida" ishtirok etganidan "chuqur afsusda" ekanligini aytdi.
“Men hech qachon OpenAI'ga zarar yetkazishni xohlamaganman. Men birgalikda qurgan hamma narsani yaxshi ko‘raman va kompaniyani qayta birlashtirish uchun hamma narsani qilaman”, dedi Sutzkever.
OpenAI direktorlar kengashi 17-noyabr kuni Altmanni ishdan bo‘shatganini e’lon qildi va u "kengash bilan muloqotda doimiy ravishda chiqmayotganini" aytdi. Altman bilan OpenAI prezidenti Greg Brokman va bir qancha yetakchi ishlab chiquvchilar kompaniyani tark etishdi. Qaror investorlar va xodimlar tomonidan qoralandi, shundan so‘ng direktorlar kengashi Altman bilan uning qaytishi bo‘yicha muzokaralarni boshladi.
OpenAI'ni tark etgach, Sem Altman Microsoft kompaniyasiga ishga kirdi va u yerda sun’iy intellekt sohasidagi "eng zamonaviy tadqiqot guruhi"ni boshqarmoqda.
Altman ishdan bo‘shatilgandan so‘ng, OpenAI rahbari lavozimini Altman va Brokmanni kompaniyaga qaytarishni rejalashtirgan bosh texnologiya direktori Mira Murati egalladi. 20 noyabr kuni OAV OpenAI direktorlar kengashi Twitch'ning sobiq rahbari Emmett Shearni vaqtinchalik bosh direktor lavozimiga yollagani haqida xabar berdi.
