«Oiladagi zo‘ravonlikni qonunan jinoyat deb e’tirof etish sari qat’iy bormoqdamiz» — Tanzila Norboyeva

O‘zbekiston Oliy Majli Senati raisi Tanzila Norboyeva 15 mart kuni BMTning Inson huquqlari bo‘yicha Oliy komissari Folker Tyurk bilan uchrashdi. Uchrashuvda O‘zbekistonning inson huquqlari sohasida xalqaro tamoyillarni ta’minlayotgani bilan bir qatorda konstitusiyaviy islohotlar ham muhokama qilindi.

Muloqot davomida BMT inson huquqlari bo‘yicha shartnomaviy organlari orqali mamlakatning xalqaro majburiyatlarini amalga oshirishda parlamentning rolini oshirish yuzasidan hamkorlikni samarali yo‘lga qo‘yish borasida fikr almashildi.

Folker Tyurk O‘zbekistonda gender tengligini ta’minlash borasida erishilgan natijalarni, amalga oshirilayotgan ishlarni qo‘llab-quvvatlashini bildirdi. Oliy komissar mojaroli hududlardan o‘zbekistonlik ayollar va bolalarni qaytarish, ularni jamiyatga reintegrasiya qilish borasidagi sa’y-harakatlariga yuksak baho bergan.

«O‘zbekiston inson huquqlari sohasida xalqaro tamoyillarga sodiq bo‘lib, o‘z qonunchiligini xalqaro standartlarga izchil muvofiqlashtirib bormoqda. Bu jarayonda halqaro tashkilotlarning gender zo‘ravonlikka barham berishga oid tavsiyalari alohida diqqatimiz markazidadir. Hozirda O‘zbekistonda oiladagi zo‘ravonlikni kriminalizasiyalash sari qat’iy bormoqdamiz va bu muhim qadam bo‘yicha pozisiyamiz o‘zgarmaydi», — degan uchrashuvda Oliy Majlis Senati raisi Tanzila Norboyeva.

Suhbat chog‘ida xotin-qizlarning jamiyat va davlat hayotidagi rolini kuchaytirish, ijtimoiy-inklyuziv muhit va fuqarolik jamiyati institutlarini rivojlantirish masalalariga ham e’tibor qaratilgan. Uchrashuv yakunida jamiyatda inson huquqlarini ishonchli himoya qilish mexanizmlarini ishga solishga qaratilgan hamkorlikni kuchaytirishga kelishib olindi.