Nafaqat ishga ehtiyoji bor xotin-qizlar, balki iqtisodiy ahvoli yaxshi, lekin ishlash istagidagi ayollarning ham bandligini ta’minlash kerak — Senat Raisi

Oliy Majlis Senati Raisi Tanzila Norboyeva boshchiligidagi respublika ishchi guruhi xotin-qizlar bandligini ta’minlash, tadbirkorlik faoliyatini qo‘llab-quvvatlash bo‘yicha ishlarning borishi bilan tanishish va aholi bilan bevosita muloqot qilish maqsadida Toshkent viloyatining Chinoz tumanida bo‘ldi.

«Birlik» MFYda xonadonma-xonadon yurib, ishsiz xotin-qizlar, ularning bandligini ta’minlashga oid ehtiyojlari, imkoniyatlari, tadbirkorlikka qiziqishi bo‘yicha o‘tkazilgan o‘rganishlarning dastlabki natijalari tahlil qilindi. O‘rganish jarayonining o‘zida 54 nafar ayolning bandligi ta’minlangani, 11 nafariga kredit ajratilib, tadbirkorlik faoliyatiga jalb qilinganligi aytib o‘tildi.

616 ta xonadonga ega mahallaning drayveri issiqxonachilik bo‘lib, 90 foizdan ziyod xonadon aynan shu yo‘nalish orqali daromad topadi. O‘tgan yilda mahalladagi issiqxonalarda yetishtirilgan 30 ming tonna qishloq xo‘jaligi mahsulotlari eksportga chiqarilgan.

Mahalla yettiligi bilan kechgan suhbat jarayonida kambag‘allikni qisqartirish, buning uchun oilaviy tadbirkorlikni, tomorqachilikni, mahallada xizmat ko‘rsatish sohalarini yanada rivojlantirish, ayniqsa xotin-qizlar orasida qo‘shimcha kasblarga o‘qitish va ish bilan ta’minlash orqali norasmiy bandlik ulushini kamaytirish masalalariga e’tibor qaratildi. Shuningdek, yettilikning o‘zaro hamkorligi, masalalarni birgalikda bir tizim bo‘lib, hal etish yuzasidan tavsiyalar berildi.

Xususan, Senat Raisi nafaqat ishga ehtiyoji bor xotin-qizlar, balki iqtisodiy ahvoli yaxshi, lekin ishlash istagida bo‘lgan ayollarning ham bandligini ta’minlash kerakligini aytib o‘tdi. Shuningdek, masalaga har bir mahallaning o‘ziga xosligi va drayver sohalaridan kelib chiqib yondashish zarurligini ta’kidladi.

Shu yerning o‘zida xatlov jarayonida aniqlangan ehtiyojmand ayollar bilan ham muloqot o‘tkazildi. Ayni paytda xotin-qizlarni qo‘llab-quvvatlash maqsadida ularga yaratilayotgan sharoitlar, ta’lim olishi, tadbirkorlik faoliyatini yo‘lga qo‘yishlari uchun berilayotgan imtiyozlar haqida batafsil tushuncha berildi. Tikuvchilik hunari bo‘lgan 9 nafar ayolga o‘zini-o‘zi ish bilan band qilib, oilasiga qo‘shimcha daromad keltirish imkoniyatini yaratish maqsadida tikuv mashinalari taqdim etildi.

Shundan so‘ng «Birlik» mahallasida tomorqachilik orqasidan yaxshigina daromad ko‘rayotgan oilalar xonadonlariga tashrif buyurildi. Tursunova Nasibaxon xonadonining 10 sotix maydonida issiqxona tashkil etib, birinchi mavsumda bodring, ikkinchi mavsumda esa pomidor yetishtirib, 140 mln so‘m daromad ko‘rmoqda.

Mahalladagi boshqa bir xonadon sohibasi Xalikulova Maxbuba 25 sotix issiqxonada ko‘chatchilikni yo‘lga qo‘ygan bo‘lib, bu yil o‘rtacha 500 mln so‘m daromad ko‘rishni reja qilgan.

Xonadon egalari bilan suhbat chog‘ida mahallada tomorqasidan yetarli foydalana olmayotgan oilalarga ham dastlabki bosqichda tomorqachilik sir-asrorlarini o‘rgatish, tajribalarini ommalashtirish yuzasidan takliflar berildi.

Tumanning «Obihayot» MFY aholisi asosan o‘z tomorqalarida oilaviy korxona tashkil etib, intensiv usulda baliq yetishtirish bilan shug‘ullanishadi. Senat Raisi mahallada «Arnasoy cho‘rtani» va «Kushfar fish» oilaviy korxonalarini tashkil etgan aholi xonadonlarida bo‘ldi.

Ushbu xo‘jaliklar egalari baliqni uvuldiriq holatidan aholi dasturxoniga yetib borgunga qadar bo‘lgan jarayongacha yetishtirishni yo‘lga qo‘ygan. Tadbirkorlar bilan bo‘lib o‘tgan suhbat jarayonida faoliyatni kengaytirishlari, qo‘shimcha ish o‘rinlari yaratishlari uchun imtiyozli bank kreditlari ajratiladigan bo‘ldi.