Lukashenkoning tahdidi: "Kim qonunni buzib ruxsat berilmagan namoyishlarga chiqsa – talabalikdan mahrum qilinadi"

Belarus prezidenti Aleksandr Lukashenko norozilik namoyishlarida qatnashgan talabalarga o‘qishdan chetlatish bilan tahdid qildi.

«Talabalar. O‘qish uchun keldingizmi – o‘qing! Kim xohlasa – o‘qisin. Kim qonunni buzib ruxsat berilmagan namoyishlarga chiqsa – talabalikdan mahrum qilinadi. Iltimos, men aytganimdek, ularni yoki armiyaga yuboringlar yoki [universitetdan] ko‘chaga chiqarib yuboringlar», – degan Lukashenko oltinchi UmumBelarus milliy yig‘ilishiga tayyorgarlik chog‘ida.

Oktyabr oyining boshlarida talabalari norozilik namoyishlarida qatnashgan 3 ta oliy o‘quv yurtining rektorlari ham ishdan bo‘shatilgan edi. Hukumat buni «tartibga solish» maqsadida amalga oshirilganini ta’kidlagan.

Sentyabr oyida «Belarus – Kelajak» fondi norozilik namoyishlarida qatnashib, oliygohlardan haydab yuborilgan talabalarni Ukraina universitetlariga o‘qishga kirishiga yordam berishini ma’lum qilgan. Yordam aynan qanday shaklda bo‘lishi ochiqlanmagan.