Kiyevning o‘qqa tutilishi islom markazi va maktablarga zarar yetkazdi

2 sentyabrga o‘tar kechasi Rossiya armiyasi Ukraina hududini 35 ga yaqin raketa va 23 ta uchuvchisiz samolyot bilan o‘qqa tutdi. Asosiy zarba Kiyevga tushdi. Bu yerda bir kecha-kunduzda otishma natijasida kamida ikki kishi yaralangan. Raketalardan biri Islom madaniyat markaziga kelib tushgan.

"Rossiya ma’naviy va insoniy qadriyatlarni mensimaydi, hech qanday din va e’tiqodni hurmat qilmaydi, u bizning barcha jamoalarimizni va hatto ziyoratgohlarni yo‘q qilishga urinib, ukraina xalqiga qarshi kurashni to‘xtatmaydi" - dedi Ukraina prezidenti Vladimir Zelenskiy.

2024 yil 1 sentyabr yakshanba kuniga to‘g‘ri kelganligi sababli o‘quv yili 2 sentyabrda boshlandi. Tungi otishmalar natijasida Kiyevdagi ikkita maktab zarar ko‘rgan. Ularning derazalari portlashlar natijasida uchirib ketgan. Kiyev shahar ma’muriyati o‘qqa tutilishi o‘quv jarayoniga ta’sir qilmaganini ma’lum qildi.