Ispaniya prokuraturasi “Real” futbolchisi uchun 4 yillik qamoq jazosi talab qilmoqda

Ispaniya prokuraturasi Madridning “Real” klubi va Ispaniya terma jamoasi himoyachisi Raul Asensio uchun 4 yillik qamoq jazosini talab qilmoqda. Bu haqda Marca nashri xabar bermoqda.

Ma’lumotlarga ko‘ra, Asensio voyaga yetmagan qiz ishtirokidagi video yozuvni saqlash va uni boshqa shaxslarga ko‘rsatishda ayblanmoqda. Bundan tashqari, yana bir jabrlanuvchi Asensio ustidan shunga o‘xshash da’vo arizasini tayyorlamoqda. Har ikki jabrlanuvchiga “psixologik jarohat va stress sindromi” tashxisi qo‘yilgan, ularning fikriga ko‘ra, Asensioning mashhurligi holatni yanada og‘irlashtirgan.

Raul Asensio jabrlanuvchilar bilan yaqin munosabatda bo‘lmagan. Biroq u shaxsiy axborotni tarqatish hamda voyaga yetmagan shaxsga oid nojo‘ya mazmundagi materialni namoyish etish bilan bog‘liq moddalar asosida ayblanmoqda.

Prokuratura ma’lumotiga ko‘ra, Asensio ushbu videoni ruxsatsiz tarzda qo‘lga kiritgan va uni boshqa bir kishiga ko‘rsatgan. Shu bois u quydagi holatlar bo‘yicha ayblanmoqda:

- Videoyozuv jabrlanuvchilarning roziligisiz tayyorlangan,
- Jabrlanuvchilar materialning o‘chirilishini so‘ragan,
- Videodagi shaxslardan biri voyaga yetmagan bo‘lgan.

Shikoyatga ko‘ra, jabrlanuvchi tomon Asensioga nisbatan quyidagi miqdorlarda moddiy va ma’naviy zararlar uchun kompensasiya talab qilmoqda:

27 000 yevro – vaqtinchalik ruhiy va jismoniy jarohatlar uchun,
21 000 yevro – stress va psixologik asoratlar uchun,
10 000 yevro – ma’naviy zararlar uchun

Shuningdek, jabrlanuvchi tomon advokatlari Asensioni kuniga 10 yevro hisobida 20 oy davomida jarima to‘lashga, shuningdek, “Real” futbolchisi sifatidagi maqomini inobatga olgan holda 58 ming yevro miqdorida qo‘shimcha moddiy kompensasiya to‘lashga majbur etishni talab qilmoqda. Yana uch nafar gumonlanuvchi uchun esa 4 yil-u 10 oylik qamoq jazosi so‘ralgan.