Hindiston Rossiya suv osti kemalaridan voz kechdi
Rossiya qurollarining eng yirik xaridori Hindiston Moskvaning Project 677 Lada suv osti kemalarining eksport versiyasi bo‘lgan Amur-1650 platformasi asosida suv osti kemalarini qurish taklifini rad etdi.
"The Moscow Times" gazetasining yozishicha, "Rosoboroneksport" vakillari hindistonlik hamkasblariga ishlab chiqarishning 80 foizini Hindiston zavodlarida mahalliylashtirishga va’da berishgan va ikki davlatning "strategik sherikligi"ga murojaat qilgan bo‘lsalar-da, Nyu-Dehlidagi harbiylar o‘z flotini modernizasiya qilish bo‘yicha Germaniya bilan shartnoma tuzishni afzal ko‘rgan. Shunday qilib, Hindiston Germaniyaning Thyssenkrupp konserni tomonidan ishlab chiqarilgan 6 ta suv osti kemasini sotib olishni kutmoqda, ular Hindistonning Mazagon Dock kompaniyasi bilan loyihani amalga oshirish uchun qo‘shma korxona yaratadi.
Bitimning umumiy qiymati 5,2 milliard dollarga baholanmoqda, uning dastlabki tasdiqlanishi 7-iyun, chorshanba kuni Germaniya mudofaa vaziri Boris Pistorius Nyu-Dehliga ikki kunlik tashrif bilan kelganida kutilmoqda.
"Bu nafaqat Germaniya sanoati, balki Hindiston va Hindiston-Germaniya strategik sherikligi uchun ham katta va muhim shartnoma bo‘ladi", dedi Pistorius bo‘lajak safarni sharhlar ekan.
Stokgolm Xalqaro Tinchlik Tadqiqot Instituti ma’lumotlariga ko‘ra, so‘nggi besh yil ichida Rossiyaning Hindistonga qurol yetkazib berish hajmi 37 foizga kamaydi, bu davrda “Rosoboroneksport” AQSh sanksiyalari ostida edi.
