Hech bir fuqaroning murojaati e’tiborsiz qolmayapti
Xabar berib borayotganimizdek, Toshkent shahar sudi va Toshkent shahar ma’muriy sudi tomonidan huquqiy jihatdan ko‘makka muhtoj fuqarolar uchun galdagi sayyor qabul bo‘lib o‘tdi.
Yunusobod tumanidagi “1-Otchopar” mahalla fuqarolar yig‘inida o‘tgan sayyor qabulda Toshkent shahar sudi raisi Erkin Xodjakulov, Toshkent shahar ma’muriy sudi raisi Ulug‘bek Almamedov va Toshkent shahar sudi rais o‘rinbosarlari Akbarali Turabov va Maqsudbek Saidov, Toshkent shahar sudi sudyasi Anvar Yoriyev, fuqarolik ishlari bo‘yicha Mirzo Ulug‘bek tumanlararo sudi raisi Rustam Tangabayev, jinoyat ishlari bo‘yicha Yunusobod tuman sudi raisi Murodjon Mirzajonov hamda rais o‘rinbosari Fotima Ismailova, shuningdek sudyalar fuqarolarning murojaatlarini qabul qilishdi.
Sayyor qabulda jami 50 nafar fuqarolar qabul qilindi. Qabul qilingan fuqarolarning 24 nafari jinoyat ishlari bo‘yicha, 21 nafari fuqarolik ishlari bo‘yicha, 2 nafari iqtisodiy ishlar bo‘yicha va 3 nafari ma’muriy sudlarga oid murojaatlarni tashkil etadi. Shundan 36 nafar fuqaroning og‘zaki murojaati, 14 nafar fuqaroning yozma murojaatlari qabul qilindi. Jami 50 ta murojaatlardan 36 tasi bo‘yicha huquqiy tushuntirishlar berildi, 14 ta murojaat joyida ijobiy hal etilib, murojatlar qanoatlantirildi.
Shuningdek, jinoyat ishlari bo‘yicha Yunusobod tuman sudi tomonidan 12 nafar shaxs jazoni o‘tashdan muddatidan oldin ozod qilindi.
Toshkent shahar sudi matbuot xizmatining ma’lumot berishicha, Toshkent shahar sudi va Toshkent shahar ma’muriy sudi tomonidan o‘tkaziladigan galdagi sayyor qabul esa 7 oktyabrda Mirzo Ulug‘bek tuman fuqarolari uchun bo‘ladi.
