Buxoroda kanal muhofaza zonasidagi 125 tup daraxt kesib tashlandi

Peshku tumanida kanal bo‘yida o‘sib turgan 125 tup daraxt kesib tashlangani aniqlandi. Bu haqda Bosh prokuratura matbuot xizmati xabar berdi.

Ma’lum qilinishicha, tumanning Mustaqillik, Chig‘irchi, Yangibozor, Sadir va Malishoyak mahallalari hududidan oqib o‘tuvchi “Zandani” kanalining muhofaza zonasida 125 tup daraxt kesilgan. Daraxtlarning 23 tupi qimmatli, 102 tupi esa qimmatbaho bo‘lgan.

Dastlabki xulosaga ko‘ra, hududda daraxtlar kesilishi oqibatida tabiatga 1,7 mlrd so‘mdan ortiq miqdordagi zarar yetkazilgan.

Holat yuzasidan Buxoro viloyati prokuraturasi tomonidan jinoyat ishi qo‘zg‘atilib, dastlabki tergov harakatlari o‘tkazish uchun ichki ishlar organlariga yuborilgan. Jinoyat ishi tergovi ustidan prokuror nazorati o‘rnatilgan.

Oldinroq Toshkentda quruvchi 10 tup daraxtni qasddan quritgani aniqlangandi.