Bo‘stonliqda “Green Hills Resort” yangi dam olish maskani ochildi

Toshkent viloyati, Bo‘stonliq tumani, Chimboylik qishlog‘ida (Oqtosh) joylashgan “Green Hills Resort” yangi dam olish maskanining tantanali ochilish marosimi bo‘lib o‘tdi.

Mazkur loyiha O‘zbekiston Respublikasi Prezidentining O‘zbekistonda turizmni rivojlantirish va xorijiy investorlarni jalb etishga doir qarorlarining Toshkent viloyati Bo‘stonliq tumanidagi ijrosi doirasida “SAIPRO GROUP ” kompaniyasi tomonidan amalga oshirildi. Dam olish maskani Oqtosh qishlog‘i yaqinida joylashgan bo‘lib, Oqtosh “Chorvoq” erkin sayyohlik zonasi tarkibiga kiradi. Hududda kottej va mehmonxonalar, ochiq o‘yin maydonchalari va restoran mavjud.

“Green Hills Resort” xalqaro sifat va ekologik toza standartlarga muvofiq qurilib, ham O‘zbekiston fuqarolari, ham xorijlik sayyohlarning maroqli dam olishi uchun mo‘ljallangan. “Green Hills Resort” nafaqat tabiat go‘zalligi, balki o‘ziga xos shifobaxsh havosi bilan hayratga soladigan so‘lim tog‘ hududida joylashgan. Dam olish maskanini loyihalash va qurishda tabiat va faol dam olish o‘rtasida uyg‘unlik yaratishga alohida e’tibor qaratildi. Ushbu maskanda sport va o‘yin maydonchalari mavjud. Xususan, mini-futbol, shaxmat, arqonli maydoncha, suzish havzasi, tog‘ yon-bag‘irlari va soylar bo‘ylab sayr qilish mumkin yunalishlar.

Shuni ta’kidlash kerakki, “Green Hills Resort” yilning to‘rt faslida dam olish uchun mo‘ljallangan bo‘lib, nafaqat individual yoki oilaviy mehmonlarni qabul qilish imkoniyatiga ega, balki korporativ tadbirlar, jumladan konferensiyalar, forumlar, korporativ yubileylarni nishonlash, teambuilding kabi tadbirlar uchun ham mo‘ljallangan.

Piyodalar yo‘laklarini o‘tkazishda imkon qadar ekotalablarga rioya qilindi, darahtlar va atrof-muhitga zarar yetkazilmadi. Shuni alohida ta’kidlash joizki, “Green Hills Resort” ning asosiy vazifasi hududning so‘lim tabiatini saqlab qolish va yanada intensiv obodonlashtirishdan iborat. Bu hatto uning nomida ham o‘z ifodasini topgan. Bunda O‘rmon xo‘jaligi hamda Ekologiya va atrof-muhitni muhofaza qilish davlat qo‘mitalari katta yordam bermoqda. Bu harakatlarning barchasi “Yashil Makon” umummilliy loyihasi doirasida amalga oshirilmoqda. Qurilish jarayonida hududdagi mavjud barcha daraxtlar saqlanib qoldi, qo‘shimcha ravishda yana 800 tupdan ortiq turli navdagi daraxt ko‘chatlari ekildi. Ayni paytda Davlat o‘rmon xo‘jaligi qo‘mitasi “Green Hills Resort” hududida o‘sayotgan barcha darahtlarni yanada asrab-avaylash maqsadida daraht turi va yoshi ko‘rsatilgan holda “pasportizasiya”dan o‘tkazilmoqda.

Mehmonlar uchun turar-joy qurilishida ekologik talablarga rioya qilingan. Hududda joylashgan yog‘och uylar ekologik taxtadan qurilgan bo‘lib, uy-joy ishlab chiqarish bo‘yicha jahonning yetakchi brendlaridan biri bo‘lgan HONKA® savdo belgisi ostida Finlyandiyaning Honkarakenne Oyj kompaniyasi tomonidan loyihalashtirilgan va yetkazib berilgan. HONKA® yog‘och uylari tabiiy xomashyo va innovasion texnologiyalardan foydalangan holda qurilgan. Dam oluvchilar bunday uylarda shimoliy o‘rmonlar ruhi va fin qarag‘aylari nafasini his qilishadi. Shu bilan birga, uylar o‘ziga xos dizayn va zamonaviy sharoitlarga ega.

HONKA® uyi Finlyandiyaning markaziy qismidagi Karstula shahrida eng yuqori sifat va ekologik standartlarga muvofiq ishlab chiqariladi. Bugungi kunda dunyoning 50 dan ortiq mamlakatlarida 85 000 dan ortiq HONKA® binolari mavjud. “Green Hills Resort” hududida bugungi kunda 11 ta kottej mehmonlarni qabul qilishga tayyor. Kelgusida kottejlar sonini 40 taga yetkazish rejalashtirilgan.

Bundan tashqari, Honkarakenne Oyj bilan hamkorlik doirasida “Green Hills Resort” ga tutash hududda loyiha amalga oshirilmoqda. Unga ko‘ra, HONKA® Santa Klaus qarorgohini taqdim etadi. Bu sayyohlar va mehmonlarni yanada ko‘proq jalb qilib, bayram kunlarida quyoshli O‘zbekistonda Laplandiyaning bir bo‘lagi bo‘lgan ajoyib muhitni yaratadi.

Yaxshi va yoqimli dam olish omillaridan biri - bu mazali taomlar. “Green Hills Resort” hududida Yevropa va milliy taomlarning boy menyusiga ega ajoyib restoran mavjud. Professional oshpazlar nozik ta’bli mehmonlarning ham talablarini qondira oladilar. Taomnomaga birinchi taomlar, go‘shtli taomlar, tandirda pishirilgan taomlar, panjara, salatlar va gazaklar kiritilgan. Restoran nafaqat oilaviy yoki individual tashriflar uchun, balki banketlar, bayramlar va korporativ tadbirlar uchun ham mo‘ljallangan.

“Green Hills Resort” mavsumining tantanali ochilish marosimida rasmiylar, xalqaro tashkilotlar vakillari, shuningdek, biznes hamkorlar va tadbirkorlar ishtirok etdi. Marosimda Honkarakenne Oyj (Finlyandiya) kompaniyasi Bosh direktor o‘rinbosari-savdo bo‘yicha direktori Mariya Turenkova dam olish maskani rahbariyatiga kottejlarning sifat standartlari va ekologik talablarga to‘liq muvofiqligi to‘g‘risidagi sertifikatni topshirdi.

Shundan so‘ng mehmonlar e’tiboriga sovrinli o‘yinlar va taniqli o‘zbek estradasi yulduzlari ishtiroida ko‘ngilochar-konsert dasturi taqdim etildi.

Yaqin kelajakda “Green Hills Resort” loyihasini mahalliy va xorijiy sarmoya hisobidan kengaytirish rejalashtirilgan.

“SAIPRO GROUP ” yaqin kelajakda ushbu hududda turizm, qishloq xo‘jaligi, ekologiya va sportni o‘zida birlashtirgan ko‘p tarmoqli klaster, hamda kichik sanoat klasterini yaratishni o‘z oldiga maqsad qilib qo‘ydi. Bu iqtisodiyot rivojiga, hududning eksport salohiyatini oshirishga, qolaversa yangi ish o‘rinlari yaratishga xizmat qiladi.

Shunday qilib “Green Hills Resort” bu yo‘nalishdagi dastlabki bosqichlardan biri bo‘lib, dam olish maskanida 95 ta yangi ish o‘rni tashkil qilindi. Shundan 60 ta ish o‘rniga hududda istiqomat qiluvchi aholi, jumladan, ayollar va yoshlar olindi. Ta’kidlash joizki, mazkur loyihalar mahalliy va xorijiy sarmoyalarni jalb etish hisobiga amalga oshirilishi rejalashtirilgan.