Bomdod namoziga uxlab qolmaslik uchun yangi ixtiro (foto+video)

 Tong. Uyquning eng shirin payti… O‘rindan turmasdan yana ozroq tushlar olamida qolishni istaydi kishi. Biroq bomdod namoziga turish kerak. «Hali vaqt bor-ku, yana besh daqiqa uxlay, keyin turaman» va ana! Soat bonglari ishga turadigan vaqt bo‘lganining xabarini bermoqda! Bu safar ham bomdod namoziga uxlab qolding. Senga shu holat tanishmi?

  O‘ylashimcha, ko‘pgina musulmonlar bunday ahvolni yaxshi biladilar. Ammo tirishqoq musulmonlar bizlarni issiqqina to‘shakdan bomdod namoziga turg‘azishning yangi usulini topdilar.

Britaniyalik musulmonlar namozga uyg‘otuvchi yangi FajrUp mobil ilovasini yaratishdi. Ular «Ummatning kuchi – birlikda» islomiy shioridan kelib chiqqan holda ilovada musulmonlarga ko‘proq savob orttirish imkonini berganlar. Ilovaning ishlash tartibi juda oddiy: «O‘zing uyg‘ondingmi – boshqa birovni uyg‘ot va mukofot ol». «Assalomu alaykum» hamda «As-solatu xoyru minan-navm» («Uyqudan namoz yaxshidir!») jumlalarining ma’nolarini bilamiz. Sizga uyg‘otish uchun qo‘ng‘iroq qilgan odam ayni mana shu so‘zlarni aytadi. Bomdod namoziga aytilgan azondan 15 soniya o‘tib, qo‘ng‘iroq VoIP aloqa tizimi orqali keladi.

Foydalanuvchilar FajrUppie («Meni bomdodga uyg‘ot!») yoki FajrUpper («Bomdodga uyg‘otishim mumkin») kabi asosiy sozlamalarni tanlashlari mumkin. Shuningdek, ilovada qiblani aniqlovchi raqamli kompas, farz namozlarining o‘qilish vaqtlari hamda islomiy bayram va muhim sanalarni ko‘rsatuvchi qo‘shimcha imkoniyatlar ham mavjud. Minimal reklama xarajatlarini hisobga olgan holda ilovaning ishga tushgan vaqtidan boshlab shu paytgacha 38.000 marta yuklab olingan.

FajrUp ilovasi Android, iOS tizimlari uchun ham moslashtirilgan.