Bloger Sherali Komilov hibsga olindi
15 iyul kuni soat 17 lar atrofida Toshkent viloyati Qibray tumani Do‘rmon aholi punktida bloger Sherali Komilov hibsga olindi. Bu haqda O‘zbekiston inson huquqlari "Ezgulik" jamiyatining raisi Abdurahmon Tashanov xabar berdi.
U Qashqadaryo viloyati IIB Tergov bo‘limi tomonidan bir yil avval e’lon qilingan ayblov va kidiruv doirasida hibsga olingan. Blogerning avval Qibray tumani IIBga, so‘ng O‘zbekiston Respublikasi IIVning 1-sonli tergov izolyatoriga olib ketilgani aytilmoqda.
Qashqadaryo viloyati IIB Tergov bo‘limi tergovchisi sanksiyasi bilan Sherali Komilov istiqomat qilgan xonadonda tintuv o‘tkazilgan. Tintuv davomida Komilovga tegishli ashyolar, texnikalar surishtiruv organi tomonidan olib ketildi.
Guvohlarga ko‘ra, blogerni qo‘lga olish jarayonida 15 nafarga yaqin IIO xodimlari qatnashgan.
Bloger Qashqadaryo viloyatiga etap qilinishi mumkin, unga nisbatan viloyat IIB tomonidan firibgarlik, tuhmat va haqorat singari ayblovlar bilan jinoyat ishi qo‘zg‘atilgan. U so‘nggi bir yil davomida tergovdan yashirinib kelgan.
Sherali Komilov 1979 yilda Qashqadaryo viloyati Kitob tumani Qaynar qishlog‘ida tug‘ilgan.
