Bloger Fazilat Salimova va 23:00 dan keyin yopilgan restoran mojarosi. Aslida, nima bo‘lgandi?

2022 yilning 05 noyabr kuni Termiz shahri “Guliston” mahallasida joylashgan Pedagogika kollejida Termiz shahar sektor rahbarlarining sayyor qabuli vaqtida bloger Fazilat Salimova tomonidan Termiz shahar IIB boshlig‘i podpolkovnik E.Nurullayev va shahar prokurori adliya maslahatchisi X.Mamatqulovga Termiz shahri “Baynalminal” mahallasida joylashgan “Al-Qasr” restorani kechki 23-00dan keyingi vaqtlarda yoptirilishi tadbirkorlik faoliyatiga to‘sqinlik bo‘layotganligi yuzasidan murojaat qilgan.

Ushbu video murojaat yuzasidan surishtiruv ishlari olib borilganda, Termiz shahar hududida «Xavfsiz shahar» konsepsiyasi doirasida O‘zbekiston Respublikasi Vazirlar Maxkamasining 2019 yil 24 iyul kunidagi 624-sonli qarori (https://lex.uz/docs/4439535) ning 3-bandi birinchi xat boshida, umumiy ovqatlanish korxonalari va ko‘ngilochar ob’ektlar rahbari tomonidan ushbu qarorning 2-bandida belgilangan talablar bajarilganligi haqida, hududiy ichki ishlar organlariga belgilangan tartibda xabarnoma yuborilishi belgilangan bo‘lsada, “Al-Qasr” restorani rahbari tomonidan ichki ishlar idorasiga Qarorning 2-bandida ko‘rsatilgan talablar bajarilganligi to‘g‘risida xabarnoma yuborilmagan. Ushbu qarorning 2-bandida belgilangan talablariga rioya etmagan holda tungi vaqtda faoliyat yuritish taqiqlanadi hamda qonunchilik hujjatlarida belgilangan tartibda javobgarlikka sabab bo‘lishi qayd etilgan.

VMning 624-sonli Qarorning 4-bandining ikkinchi xat boshiga asosan O‘zbekiston Respublikasi IIV, Milliy gvardiya bilan birgalikda patrul guruhlari tomonidan tungi vaqtda (qonunchilik hujjatilariga asosan tungi vaqt soat 23-00dan soat 06-00gacha deb belgilangan) faoliyat yurituvchi umumiy ovqatlanish korxonalari va ko‘ngilochar ob’ektlar joylashgan yo‘nalishlarda doimiy nazorat o‘rnatilishi to‘g‘risidagi talabni ijro qilish maqsadida, Termiz shahri “Baynalminal” mahallasida joylashgan “Al-Qasr” restoranida 2022 yil 27 oktyabr kuni tungi soat 00:30da shovqin-suron bo‘layotganligi sababli jamoat tartibini saqlash, fuqarolar tinchligi va xavfsizligini ta’minlash maqsadida, “Al-Qasr” restoraniga ichki ishlar xodimlari kirganida, bir nechta fuqarolar spirtli ichimlik iste’mol qilib o‘tirishganligi aniqlanib, ularga ortiqcha spirtli ichimlik ichmasliklari va jamiyatda yurish-turish qoidalariga rioya qilishlari tushuntirilganida, ichki ishlar xodimlarining qonuniy talablarini bajarmasdan qo‘pol muomilada bo‘lib uyatsiz so‘zlar bilan haqorat qilib, jamoat tartibini buzib, baqir-chaqir qilganliklari uchun, ichki ishlar xodimlari tomonidan qoidabuzarlar tibbiy ko‘rikdan o‘tkazilib, shahar ichki ishlar boshqarmasiga keltirilgan.

To‘plangan ma’muriy huquqbuzarlik ishi jinoyat ishlar bo‘yicha, Termiz shahar sudi tomonidan 2022 yil 28 oktyabr kuni ko‘rib chiqilib, fuqarolar S.A, B.I hamda muqaddam 3 marotaba jinoiy javobgarlikka tortilgan SH.S larga “O‘zbekiston Respublikasi MJtKning 194-moddasi 1-qismi va 183-moddalarida nazarda tutilgan huquqbuzarlikni sodir qilganlikda aybli”- deb topilib, bazaviy hisoblash miqdorining 2-baravari miqdorida jarima jazosi hamda har biriga 5 sutkadan ma’muriy qamoq jazosi tayinlangan.

Ma’lumot uchun: O‘zbekiston Respublikasi Prezidentining “Xizmatlar sohasini rivojlantirishga oid qo‘shimcha chora tadbirlar to‘g‘risida” 2022 yil 27 yanvardagi PQ-104-son Qarorining 8-bandi a) kichik bandining 2-xat boshida, 3-ilovaga muvofiq tuman va shaharlarning markaziy ko‘chalarini savdo, ko‘ngilochar, gastronomik, turizm va san’at yo‘nalishlariga ixtisoslashgan maxsus savdo va ko‘ngilochar ko‘chalarga aylantirish belgilangan.

Ushbu Qarorning 3-ilovasiga muvofiq, maxsus xizmat ko‘rsatish ko‘chalariga aylantiriladigan markaziy ko‘chalar ro‘yxatiga Surxondaryo viloyati Termiz shahridagi “Navbog‘” va “Dilnavo” ko‘chalari kiritilgan.

Termiz shahrining ushbu ko‘chalardan boshqa ko‘chalarida joylashgan xizmat ko‘rsatuvchi savdo, ko‘ngilochar, gastronomik, turizm va san’at yo‘nalishlariga ixtisoslashgan maxsus savdo va ko‘ngilochar maskanlar faoliyatini tunu-kun yo‘lga qo‘yish uchun O‘zbekiston Respublikasi Vazirlar Maxkamasining 2019 yil 24 iyul kunidagi 624-sonli qarorining 2-bandida ko‘rsatilgan talablari asosida faoliyat olib borishlari qayd etilgan. Qarorning 3-bandi birinchi xat boshisiga asosan umumiy ovqatlanish korxonalari va ko‘ngilochar ob’ektlar rahbari tomonidan ushbu qarorning 2-bandida belgilangan talablar bajarilganligi haqida hududiy ichki ishlar organlariga belgilangan tartibda xabarnoma yuborishi qayd etilgan.

O‘zbekiston Respublikasi Prezidentining “Davlat mulki obe’ktlarini va yer uchastkalariga bo‘lgan huquqlarni tadbirkorlik sub’ektlariga sotish tartibini soddalashtirish bo‘yicha qo‘shimcha chora- tadbirlar to‘g‘risida” 2018 yil 11 oktyabdagi PF-5552-son Farmoniga muvofiq “savdo-ko‘ngilochar va umumiy ovqatlanish ob’ektlari faoliyati tungi vaqtda cheklanishiga yo‘l qo‘yilmaydigan zonalarni aniqlash huquqi Qoraqalpog‘iston Respublikasi Vazirlar Kengashi Raisi va viloyatlar hokimlariga berilganligi qayd etilgan.

Surxondaryo viloyati IIB axborot xizmati