Asrab olgan 13 yoshli qizini zo‘rlagan qashqadaryolik erkak 12 yilga qamaldi
Chiroqchi tuman sudida 6 iyun kuni sudlanuvchi K. T. (1971 yilda Qashqadaryo viloyatida tug‘ilgan, Chiroqchi tumanidagi 1-sonli oilaviy bolalar uyi rahbari bo‘lib ishlagan, muqaddam sudlanmagan) ga oid jinoyat ishini ko‘rib chiqish bo‘yicha sud jarayoni tugab, sud hukmi e’lon qilindi.
Sud hukmiga ko‘ra K. T. Jinoyat kodeksining 118-moddasi (nomusga tegish) 3-qismi «a» bandi va eski tahrirdagi (2023 yil 11 aprelga qadar amalda bo‘lgan) 129-moddasi (o‘n olti yoshga to‘lmagan shaxsga nisbatan uyatsiz-buzuq harakatlar qilish) 2-qismida nazarda tutilgan jinoyatlarni sodir qilganlikda aybli deb topilib, unga Jinoyat kodeksining 59-moddasi (bir necha jinoyat sodir etganlik uchun jazo tayinlash) ga asosan 12 yil muddatga ozodlikdan mahrum qilish jazosi tayinlandi. Qayd etilishicha, tayinlangan jazoni umumiy tartibli koloniyalarda o‘tash belgilangan.
Shuningdek, Oliy sud matbuot xizmatining ma’lum qilishicha, Jinoyat kodeksining 73 va 74-moddalari talablariga muvofiq o‘n sakkiz yoshga to‘lmagan jabrlanuvchining nomusiga tekkanlik hamda o‘n olti yoshga to‘lmagan shaxsga nisbatan uyatsiz-buzuq harakatlar qilganlik uchun hukm qilingan shaxslarga nisbatan jazodan muddatidan ilgari shartli ravishda ozod qilish va jazoni yengilrog‘i bilan almashtirish qo‘llanilmaydi.
