APL. Yozgi transferlar oynasidan keyin narxi eng qimmatlashgan futbolchilar nomi ma’lum bo‘ldi

Angliya Premyer-ligasining eng qimmatlashgan futbolchilari nomi e’lon qilindi. Odatda, yangi sotib olingan futbolchilar o‘zi bilan noma’lumlik olib keladi. Shu sababli, hech bir transferning omadli bo‘lishiga kafolat yo‘q. So‘nggi olingan ma’lumotlarga asoslanib, xarid qilingan futbolchilarning eng qimmatlashganlari ro‘yxatini tuzdik. Undan sobiq "MYu" va "Chelsi" futbolchilar joy olganiga guvoh bo‘lish mumkin.

Kuchli o‘nlikning o‘ninchi pog‘onasidan Antoni Elanga joy oldi. U "Nottingem Forest"ga ko‘chib o‘tganidan beri narxi oshdi. 21 yoshli hujumchi yozda "MYu"dan 15.2 million funtga xarid qilingan edi. U APLning 11 turida 1 ta gol va 3 ta assist qayd etdi. Shu sababli uning qiymatiga 3 foiz qo‘shildi va narxi 15.6 million funtga ko‘tarildi. Keyingi o‘rinda sobiq "Arsenal" yulduzi Aleks Ivobi keladi. Yozda u 22.3 million evaziga "Fulxem"ga ko‘chib o‘tgandi. Ayni damda Ivobining narxi 9 foizga oshib, 24.3 million funtni tashkil qilmoqda.
"Bornmut" vakili Jastin Klyuvert navbatdagi pog‘onadan joy oldi. U 25 foiz o‘sishga erishib, o‘z narxini 9.7 milliondan 12.1 millionga ko‘tarib olgan. "Byornli" yulduzi Maykl Obafemi ham bu borada yaxshigina o‘sish ko‘rsata oldi. 23 yoshli futbolchi 25 foizga qimmatlagan.

"Chelsi"ning yirik xaridlaridan biri bo‘lgan Kristofer Nkunku kutilmaganda narx borasida o‘sishga erishdi. Garchand bu mavsumda jarohatlari sababli maydonga tushmayotgan bo‘lsada, 33 foizga qimmatlashdi. U uchun "Chelsi" 52 million to‘lagandi. Hozir esa Fransiya terma jamoasi a’zosi 69.4 million funtga baholanmoqda. "Luton Taun" yarim himoyachisi Jeykob Braun keyingi futbolchi. U yozda "Stok Siti"dan 2.5 million funtga xarid qilingan. 25 yoshli futbolchi 38 foiz o‘sishga erishib, 3.4 millionga baholanmoqda.
Meddisonni keyingi pog‘onada ko‘rasiz. U "Lester"dan 40.1 million funtga xarid qilingan edi. Ayni damda Angliya terma jamoasi a’zosining narxi 60.7 million va bu 51 foizlik o‘sishni anglatadi.

Ro‘yxatdan "Tottenxem"ning yana bir yulduzi joy olgan. Deyan Kulusevski yozda 26 million funtga olib kelingan edi. Ammo hozirda shvesiyalik hujumchi 43.4 million funtga baholanmoqda. Ro‘yxatning ikkinchi o‘rnida "Byornli" yarim himoyachisi Luka Koleoshoni ko‘rishingiz mumkin. U 2.6 million funtga sotib olingandi. Ikki oy ichida Lukaning narxi 100 foizga o‘sib, 5.2 million funtga yetdi.
Birinchilik "Chelsi"ning sobiq futbolchisiga nasib etdi. Kallum Xadson-Odoi "Nottingem"ga atigi 3 million funtga sotilgandi. Ammo yarim himoyachi o‘ziga past baho berilganini isbotladi. 24 yoshli futbolchi 243 foizga qimmatlab, hozirda 10.4 million funtga narxlanyapti. Kallum "Chelsi"da uzoq yillar og‘ir davrlarni boshidan o‘tkazganini hisobga olsak, bu narsa u uchun katta mukofot bo‘ldi.