Alimentchi ota endi sudda javob beradi
Ota yoki ona o‘z farzandiga be’etibor bo‘ldimi bilingki, u o‘zi va kelajak hayoti uchun shunday e’tiborsizlikni hozirlab qo‘yadi. Chunki hayotda “emagan somsaga pul to‘lanmaydi”. Farzand oila atalmish qo‘rg‘ondan mehr ichib ulg‘ayarkan, demak, ota-onaning ham qarilik davri shunday mehr va e’tibor qurshovida o‘tadi. Bu bilan qarsak ikki qo‘ldan chiqadi degan iborani unutmaylik. Lekin unutganlar ham bor afsus.
Jumladan, fuqarolik ishlari bo‘yicha Mirzo Ulug‘bek tumanlararo sudining 2017 yil 27 sentyabr kungi sud buyrug‘iga asosan, qarzdor D.Nazarovdan undiruvchi N.Nazarova foydasiga ikki nafar voyaga yetmagan farzandlari ta’minoti uchun aliment pullari har oylik ish haqi va boshqa daromadining 1/3 qismi miqdorida undirish belgilangan bo‘lib, qarzdor tomonidan ikki oydan ortiq muddat davomida aliment pullari o‘z vaqtida to‘lanmaganligi sababli qarzdorlik vujudga kelgan.
Joriy yilning 27 may kuni Mirzo Ulug‘bek tuman Ma’muriy sudi tomonidan D.Nazarov Ma’muriy javobgarlik to‘g‘risidagi kodeksining 47-4-moddasida nazarda tutilgan huquqbuzarlikni sodir etgan deb topilib, unga 15 sutka ma’muriy qamoq jazosi tayinlangan edi.
Qarzdor D.Nazarov qo‘llanilgan ma’muriy jazodan o‘ziga tegishli xulosa chiqarmasdan, yana ikki oydan ortiq muddat davomida 2019 yil avgust oyiga qadar sud buyrug‘i bilan belgilangan jami 10.213.410 so‘m mablag‘larni to‘lamaganligi sababli, 2019 yil 23 avgust kuni Jinoyat Kodeksining 122-moddasi 1-qismi bilan jinoyat ishi qo‘zg‘atilib, surishtiruv natijasiga ko‘ra jinoyat ishi joriy yilning 30 sentyabr kuni ayblov dalolatnomasi bilan sudga yuborildi.