2024 yilda 10 ming nafar yoshlarni nemis tiliga o‘qitish, ularning 1000 nafarini Germaniyaga yuborish rejalashtirilgan

Yoshlarning chet tillarini va kasb-hunar o‘rganishga bo‘lgan ehtiyojini qondirish, ularni ichki va tashqi mehnat bozorida raqobatbardosh kadrlar sifatida tayyorlash tizimini yanada takomillashtirish yo‘nalishida “Kelajak kasblari” loyihasi orqali 17 ming nafar yoshlar zamonaviy kasblar va xorijiy tillarni o‘rgangan bo‘lsa, “Ibrat farzandlari” loyihasi doirasidagi “Ibrat Academy” mobil ilovasi yordamida mavjud 22 ta tilni 468 ming nafar foydalanuvchilar o‘rganmoqda. Ularning 20 ming nafari aynan nemis tili kurslarini o‘rganayotganlarni tashkil etadi.

Bu boradagi ishlarni kengaytirish, ishsiz yoshlarga xorijiy tillarni o‘rgatish, til biladigan, kasb-hunarli yoshlarni qo‘llab-quvvatlash orqali rivojlangan davlatlarda yuqori maoshli ish bilan ta’minlash va kasbiy ta’lim olishga (Ausbildung) qaratilgan “Germaniyada kasbiy ta’lim” pilot loyihasi ishga tushirildi.

Loyihani amalga oshirish maqsadida Yoshlar ishlari agentligi tomonidan Germaniyaning “GfM Gruppe”, “Papenburg”, “OPASCA”, GIZ (Germaniya xalqaro hamkorlik jamiyati) va Speerus tashkilotlari rahbarlari bilan muzokaralar olib borilib, hamkorlik yo‘lga qo‘yildi.

Dastlab Farg‘ona viloyati, Marg‘ilon shahri 1- va 2-sonli Abu Ali ibn Sino nomidagi Jamoat salomatlik texnikumlari tajribasi asosida respublika bo‘yicha jami 33 ta tibbiyot texnikumida bepul nemis tili kurslari Oliy ta’lim, fan va innovasiyalar vazirligi bilan hamkorlikda yo‘lga qo‘yildi. Mazkur tibbiyot texnikumilarida bugungi kunda 818 nafar hamshiralar bepul nemis tili kurslarida til o‘rganishmoqda. Ularning 64 nafari V1 darajada, 173 nafari A2 darajada, 581 nafari A1 darajada tilni o‘zlashtirgan.

Nemis tilini o‘qitishga ixtisoslashtirilgan nodavlat ta’lim muassasalari bilan hamkorlikda hududlardagi ijtimoiy himoyaga muhtoj va ishsiz yoshlardan 65 nafari saralanib, 6 oylik nemis tili kurslari xarajatlari qoplab berildi. Ularning 13 nafari bugungi kunda Germaniyada kasbiy ta’lim (Ausbildung) olmoqda. Birgina Andijon viloyati, Paxtaobod tumani, Madaniyat mahallasida yashovchi Shuhratov Ahrorbek Germaniyaning Papenburg kompaniyasida mexatronika yo‘nalishida kasbiy ta’lim (Ausbulding) olib, har oyda oilasiga 500 yevro yuborishni boshladi.

Ma’lumot uchun: A.Shuxratovga 6 oylik nemis tili o‘quv kursi uchun Agentlik tomonidan 5,6 mln so‘m mablag‘lar to‘lab berilgan.

Shuningdek, bugungi kunda 20 nafar nemis tili darajasini belgilovchi sertifikatiga (B1, B2) ega yoshlarni Germaniyaning “GfM Gruppe” tashkilotiga kasbiy ta’lim (Ausbildung) olish hamda yuqori maoshli ishlar uchun hujjatlari yuborildi. Suhbat jarayonlari tashkil etilmoqda.

Shu jumladan, Andijon viloyati, Izboskan tumani “Urganji” mahallasida nemis tilini yoshlarga chuqur o‘rgatish maqsadida 20 nafar yoshlar ishtirokida nemis tili o‘quv kursi tashkil etildi. “Urganji” mahallasi namunasi asosida 9 444 ta mahallada yoshlar yetakchilari tomonidan xatlov jarayonida Germaniyada o‘qish va ishlash istagi bor yoshlar aniqlanib ularga nemis tilini o‘rgatish tizimi yo‘lga qo‘yildi.

Rivojlangan mamlakatlarda kasbiy ta’lim olish (Ausbildung) va ishlash istagidagi yoshlar uchun zarur ma’lumotlarni o‘zida jamlagan, loyiha ishtirok etish uchun onlayn ariza qoldirish imkonini beruvchi www.xorijdaish.uz sayti ishga tushirildi.

Loyiha doirasida 2+6 dasturi ishlab chiqilib, yangicha yondashuv asosida tilni o‘rgatish tizimi yo‘lga qo‘yiladi. Bunda talabgorlar 2 oy o‘z hisoblaridan o‘qiydi, shundan so‘ng tilni o‘zlashtirish qobiliyatidan kelib chiqib saralangan yoshlarning keyingi 6 oylik kurs xarajatlarini qoplab berish uchun “Yoshlarga oid davlat siyosatini qo‘llab-quvvatlash jamg‘armasi” mablag‘lari hisobidan qoplab beriladi.

Nemis tilini o‘rgangan yoshlarga til darajasini belgilovchi sertifikat olish jarayonlarida qo‘laylik yaratish maqsadida joy ajratilib pavilion tashkil etiladi, V2 til darajasini qo‘lga kiritgan yoshlarning ham imtixon xarajatlari qoplab berishni yo‘lga qo‘yish rejalashtirilmoqda.

Germaniyada kasbiy ta’lim olish, yuqori maoshli ish bilan ta’minlash bo‘yicha yoshlar o‘rtasida doimiy ravishda targ‘ibot ishlari olib boriladi. Shuningdek, Germaniyaga kasbiy ta’lim olish (Ausbildung) hamda ishlash uchun yuborilgan yoshlarning yashash sharoitlari, faoliyatini ko‘rsatib berish maqsadida teleko‘rsatuv, mativosion rolik hamda hujjatli film tasvirga olinadi.

Agentlik tashabbusi bilan ushbu yo‘nalishdagi ishlarni kengaytirish orqali 2024 yilda 10 ming nafar yoshlarni nemis tiliga o‘qitish, ularning 1000 nafarini joriy yilda Germaniya Federativ Respublikasiga kasbiy ta’lim olish va ishga yuborish rejalashtirilgan.