Iqtisodiyot va moliya vazirligi tizimida TDIUning 2 ta kafedrasi filiallari ochildi

Bugungi global raqobat sharoitida mamlakat iqtisodiy taraqqiyoti uchun malakali kadrlar tayyorlash – strategik ahamiyat kasb etmoqda. O‘zbekiston Respublikasi Prezidentining tegishli farmon va qarorlarida iqtisodiyot hamda moliya sohasi uchun zamonaviy mutaxassislar yetishtirish zarurligi alohida qayd etilgan. Ayni shu maqsadda, Toshkent davlat iqtisodiyot universiteti o‘quv jarayoniga ilg‘or texnologiyalarni joriy etib, nazariya va amaliyot uyg‘unligini ta’minlash borasida qator islohotlarni amalga oshirmoqda.

Mazkur islohotlarning yorqin namunasi sifatida, Iqtisodiyot va moliya vazirligi huzuridagi Byudjetdan tashqari pensiya jamg‘armasida universitetning "Moliya va moliyaviy texnologiyalar" hamda "Byudjet hisoboti va G‘aznachilik" kafedralari filiallarining tashkil etilishini alohida ta’kidlash joiz.

Ushbu filiallar:

• Talabalarga to‘g‘ridan-to‘g‘ri amaliy tajriba olish imkonini beradi.

• Nazariy bilimlarni real ish jarayoni bilan uzviy bog‘laydi.

• Mehnat bozoriga tayyor, ish beruvchilar ehtiyojlariga mos mutaxassislar yetkazib beradi.

• Ilmiy tadqiqot natijalarini amaliyotga tatbiq etish ko‘lamini kengaytiradi.

Ochilish marosimida ilm-fan, ta’lim va amaliyot integrasiyasini mustahkamlovchi o‘zaro hamkorlik Memorandumi imzolandi. Bu hujjat oliy ta’lim va moliya tizimi o‘rtasidagi aloqalarni yanada mustahkamlashga xizmat qiluvchi muhim huquqiy asos bo‘ldi.

Xulosa o‘rnida aytish mumkinki, bugungi kunda O‘zbekistonda oliy ta’lim jarayoni mustaqil tizim emas, balki iqtisodiyot bilan chambarchas bog‘liq yagona ekotizim sifatida shakllanmoqda. Toshkent davlat iqtisodiyot universiteti misolida ko‘rsatilgan bu yangi yondashuv o‘z samarasini berib, ilm-fan va amaliyotni birlashtirgan holda, hayot uchun tayyorlangan mutaxassislarning yetishib chiqishini ta’minlamoqda.

Madinabonu Abdullayeva, TDIU katta o‘qituvchisi