AQSh hududida noqonuniy bo‘lib turgan O‘zbekiston fuqarolari maxsus charter reys orqali 30 aprel kuni vatanga qaytariladi

O‘zbekiston Respublikasi migrasiya siyosati va fuqarolarni repatriasiya qilish sohasida Qo‘shma Shtatlar bilan hamkorlikni faol ravishda kuchaytirmoqda.

Bu jarayonda xorijda bo‘lgan o‘zbekistonliklarning huquqlari va qonuniy manfaatlarini himoya qilishga alohida e’tibor qaratilmoqda. Erishilgan ikki tomonlama kelishuvlar doirasida joriy yilning 30 aprel kuni AQSh hududida qonuniy asoslarsiz bo‘lib turgan va deportasiya qilinadigan xorijliklar ro‘yxatiga kiritilgan O‘zbekiston fuqarolarini vatanga qaytarish maqsadida Nyu-York – Toshkent yo‘nalishi bo‘yicha maxsus charter reysi tashkil etiladi.

Mazkur repatriasiya tashabbusi xorijda og‘ir vaziyatga tushib qolgan O‘zbekiston fuqarolarining huquqlarini ta’minlashga qaratilgan bo‘lib, xalqaro me’yorlar, majburiyatlar va inson huquqlari doirasida amalga oshiriladi. Gap viza talablarini buzgan yoki AQShda qonuniy qolish muddati tugagan fuqarolar haqida bormoqda.

Repatriasiya jarayoni insonparvarlik va huquqiy tamoyillar asosida tashkil etilib, fuqarolarning munosib va xavfsiz qaytishini ta’minlaydi.

Charter reysni tashkil etish ikki davlatning konsullik va migrasiya xizmatlari bilan yaqin hamkorlikda olib borilmoqda. Barcha choralar repatriasiya qilinayotgan fuqarolarning huquqlarini maksimal darajada hurmat qilgan holda, O‘zbekiston va AQShning amaldagi qonunchiligiga qat’iy rioya etgan holda ko‘rilmoqda.

Mazkur qadam O‘zbekistonning migrasiya oqimlarini tartibga solish, xorijdagi fuqarolarining huquqiy himoyasini, ijtimoiy va huquqiy moslashuvini ta’minlash hamda ularning xavfsiz va insoniy sharoitlarda vataniga qaytishini yo‘lga qo‘yishga qaratilgan keng qamrovli siyosatining bir qismidir.

O‘zbekiston o‘z migrasiya siyosatini rivojlantirishda davom etadi va fuqarolarini har qanday vaziyatda qo‘llab-quvvatlash va himoya qilishga intiladi, deyiladi TIV xabarida.