Зеленский амалдорларга Украинадан кетишни тақиқлади
Украина ҳукумати бир қатор амалдорлар ва ҳуқуқ-тартибот идоралари ходимларига расмий мақсадсиз хорижга чиқишни тақиқлади. Бу ҳақда мамлакат президенти Владимир Зеленский айтиб ўтди.
«Бугун мен бир нечта муҳим фармонларни имзоладим. Миллий хавфсизлик ва мудофаа кенгашининг мансабдор шахсларининг хорижга чиқиб кетиши бўйича фундаментал қарори бор. Бу марказий ҳукуматнинг барча давлат хизматчилари ва маҳаллий ҳокимиятнинг турли даражадаги бошқа органларига тааллуқлидир. Мансабдор шахслар энди чет элга таътилга ёки бошқа мақсадда чиқа олмайди”, деди Зеленский ўзининг видеомурожаатида.
Унинг қўшимча қилишича, ҳукумат беш кун ичида чегарани кесиб ўтиш тартибини ишлаб чиқиш ниятида, бу фармон остида қолган давлат хизматчиларининг кетишига фақат расмий сафар сабаб бўлиши мумкин.
Фармонга кўра, мамлакатдан чиқиб кетишни тақиқлаш вазирлар ва уларнинг ўринбосарлари, халқ депутатлари, марказий ҳокимият органлари раҳбарлари ва ўринбосарлари, Зеленский девони раҳбарлари ва уларнинг ўринбосарларига ҳамда бошқа раҳбарларга тааллуқлидир.
