Янгиариқ ва Чироқчи туманларида чет эл валютасини ноқонуний айирбошлаш ҳолатлари аниқланди
Бош прокуратура ҳузуридаги Департаментнинг Янгиариқ тумани бўлими томонидан валюта қимматликларининг ноқонуний муомалага киритилишининг олдини олиш юзасидан ўтказилган тезкор тадбирда, фуқаро Х.М. бошқа бир фуқаро М.дан 3 700 АҚШ долларини 35,6 млн сўмга сотиб олган вақтида ушланиб, ундан 35,6 млн сўм ва ёнида ноқонуний айирбошлаш учун сақлаб келган 300 АҚШ доллари, 4 минг россия рубли ва 65,5 минг қозоқ тенгеси ашёвий далил тариқасида олинган.
Шу каби, Департаментнинг Чироқчи туман бўлими томонидан ўтказилган тезкор тадбирда, фуқаро А.Х. 4 500 АҚШ долларини 50,4 млн сўмга сотган вақтида ушланиб, 4 500 АҚШ доллари ашёвий далил тариқасида олинган.
Шунингдек, юқоридаги фуқароларнинг ҳаракатлари бўйича олиб борилган тезкор кузатувларда улар доимий равишда валюта қимматликларини қонунга зид равишда айирбошлаш фаолияти билан шуғулланиб келганликлари маълум бўлган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
