Ходим кетма-кет икки марта туғруқ таътилига чиқса, бу давр учун тўланадиган пул маблағи такрор бериладими?
— Менинг турмуш ўртоғим мактабда ўқитувчи бўлиб ишлайди. Ўтган йили (2017 йилда) турмуш ўртоғим учинчи фарзандимизга туғруқ таътилига чиққан эди. Ҳозирда яна хомиладор. Саволим шундан иборатки, туғруқ таътили даврига тўланадиган пул маблағи такрор бериладими? Лекин, ҳали ишга чиқиб улгурмаган ва ҳали ҳам таътилда. Туғруқ таътилини туғруқ таътилига улаб юборса, туғруқ таътили учун пул бериладими? Берилса қанча миқдорда берилади ва қанча муддатда берилиши керак. Илтимос, шу масалада қонунда белгиланган тартибни батафсил ёритиб берсангизлар. (С.С. Андижон вилояти, Шаҳрихон тумани)
Қонунчиликка мувофиқ, аёлларга туққунга қадар етмиш календарь кун ва туққанидан кейин эллик олти календарь кун (туғиш қийин кечган ёки икки ва ундан ортиқ бола туғилган ҳолларда — етмиш календарь кун) муддати билан ҳомиладорлик ва туғиш таътиллари берилиб, давлат ижтимоий суғуртаси бўйича нафақа тўланади.
Ҳомиладорлик ва туғиш бўйича нафақани тайинлаш ва тўлаш учун белгиланган тартибда берилган меҳнатга лаёқатсизлик варақаси (больничный лист) асос бўлади.
Ходим болани парваришлаш учун таътилда бўлган вақтда ҳомиладорлик ва туғиш бўйича таътилга чиқиши мумкин, бундай ҳолатда ҳам нафақа меҳнатга лаёқатсизлик варақасида кўрсатилган барча кунлари учун тўлиқ тўлаб берилади.
Бунда, нафақа суммаси лавозим маошидан ва таътил бошланишидан олдинги 12 ой мобайнида олинган мукофотларнинг ўртача ойлик суммасидан ҳисоблаб чиқарилади.
Ҳомиладорлик ва туғиш нафақаси туғишдан олдин таътилнинг тўлиқ даври учун бир йўла тўланади.
