Моддий ёрдам ва кўмакка муҳтож оилаларнинг болаларини қишки кийим-бош тўпламлари, мактаб формаси ва ўқув қуроллари билан таъминлаш мақсадида 2020 йилнинг сентябрь ойида аҳолининг қуйидаги уч тоифасига бир марталик моддий ёрдамлар берилиши кўзда тутилган эди:

1. Моддий ёрдам ва кўмакка муҳтож оилаларнинг рўйхатларига («темир дафтар») киритилган оилаларнинг 16 ёшга тўлмаган болаларига;
2. Боқувчисини йўқотганлик пенсияси ёки нафақасини олувчи оилаларнинг 16 ёшга тўлмаган болаларига;
3. Ногиронлиги бўлган 16 ёшга тўлмаган болаларга.

Ўзбекистон Республикаси Президентининг 2020 йилнинг 26 августдаги “Аҳолини ижтимоий қўллаб-қувватлашга қаратилган қўшимча чора-тадбирлар тўғрисида”ги ПҚ—4815-сон қарорига мувофиқ, бир марталик моддий ёрдам миқдори ҳар бир 16 ёшга тўлмаган болалари учун 500 минг сўм этиб белгиланган.

Молия вазирлиги ҳузуридаги Пенсия жамғармаси — боқувчисини йўқотган оилаларнинг вояга етмаган фарзандлари ҳамда ногиронлиги бўлган 16 ёшга тўлмаган болаларига моддий ёрдам пулларининг пенсияларни (нафақаларни) тўлаш учун белгиланган муддатда манзилли етказилишини таъминлайди.

Молия вазирлиги — зарур маблағларни Ўзбекистон Республикаси республика бюджетидан маҳаллий бюджетларига ўз вақтида ажратиш;

Марказий банк тижорат банклари билан биргаликда — моддий ёрдам маблағларини тарқатиш учун нақд пул билан таъминлаш бўйича масъул этиб белгиланган.

Ҳар қандай ажратилган маблағларнинг ўз эгаларига етказиб берилиши ва тўғри ажратилганлиги текшириб, ўрганилиши зарур. Чунки, инсон омили аралашган жойда ҳар қандай нохуш ҳолатлар ёки ноқонуний ва ўзлаштириш ҳолатларига йўл қўйилиши мумкин.

Мазкур Қарорда белгиланган бир марталик моддий ёрдам тўловларининг манзилли етказиб берилиши бўйича Пенсия жамғармалари ва АТ “Халқ банки” филиаллари масъул ташкилот ҳисобланади. Давлат Молиявий Назорат Департаменти ҳамда унинг ҳудудий бошқармалари шунингдек, ҳудудий молия бўлимлари томонидан уларнинг қонунийлиги ва ўз эгаларига етказиб берилганлиги ўрганилади ва текширилади.

Бугунги кунда Республика бўйича бир марталик моддий ёрдам олувчи (фарзандлар сони бўйича) жами 330 668 нафар фуқароларга 165 334,0 млн сўм миқдоридаги маблағлар тўланиши режалаштирилган бўлиб, ушбу маблағлар жорий йилнинг 8 сентябрь куни Пенсия жамғармаси томонидан АТ “Халқ банки” ва бошқа тижорат банкларига тўлиқ молиялаштирилди.

Қарор ижросини таъминлаш мақсадида Пенсия жамғармаси томонидан август ойида 8 470 нафар ногиронлик муддати тугаган болаларнинг ногиронлик муддатлари ва 41 277 нафар сентябрь ойида ўқишни давом эттираётган 16 ёшдан катта боқувчисини йўқотган болаларнинг пенсия ёки нафақа муддатлари узайтирилиб, кетма-кет уч ой давомида вақтинча уйда йўқлиги ҳамда 6 ой муддатда пенсия жамғармасига келмаган 403 нафар шаҳсларнинг пенсия ёки нафақа тўловлари тўҳтатилмагани ҳолда жорий ой тўлов қайдномаларига киритилди.

Молиялаштирилган маблағлардан 116 812,3 млн. сўми ёки 71 фоизи нақд пул шаклида ва 48 521,7 млн.сўми ёки 29 фоизи эса тижорат банкларда очилган банк пластик карталари орқали олувчиларни ташкил қилади. (жадвал илова қилинади).

Бугунги кунда (15.09.2020 йил) моддий ёрдам сифатида тўлаш учун ажратилган 165 334,0 млн сўм миқдоридаги маблағлар тўлиқ молиялаштирилган ҳамда 162 562,4 млн.сўми (98%) фуқароларга манзилли етказиб берилиши таъминланди.