Ўзбeкистон Экологик партиясининг съезди бўлиб ўтди

Ўзбeкистон Экологик партиясининг съезди бўлиб ўтди

Бугун, 30 май куни Тошкент шаҳрида Ўзбекистон Экологик партиясининг навбатдан ташқари IV съезди бўлиб ўтди. Унда 2023 йил 9 июль куни бўлиб ўтадиган муддатидан илгари Ўзбекистон Республикаси Президенти сайловида Ўзбекистон Экологик партиясидан Ўзбекистон Республикаси Президентлигига номзод кўрсатиш ҳамда Президентликка номзоднинг Сайловолди дастури тўғрисидаги ва бошқа масалалар кўриб чиқилди.

Съезд делегатлари томонидан мамлакатимизда барча сиёсий партиялар ва улар томонидан кўрсатилган номзодларнинг сайловларда иштирок этиши учун соғлом муҳит ва шароитлар яратилгани, Президент сайлови Сайлов кодексига мувофиқ умум эътироф этилган халқаро стандартлар асосида очиқ ва шаффоф ўтказилиши алоҳида таъкидланди.

Ўзбекистон Экологик партияси сайловларда ўз олдига юксак мақсад ва вазифаларни қўйгани эътироф этилди. Марказий сайлов комиссияси томонидан бўлиб ўтадиган Ўзбекистон Республикаси Президенти сайловида партиянинг иштирок этишига ижозат берилгани қайд этилди. Жорий йилнинг 11 май куни бўлиб ўтган партия Марказий Кенгашининг пленумида Ўзбекистон Экологик партиясидан Ўзбекистон Республикаси Президенти лавозимига номзод этиб партия Марказий Кенгаши Ижроия қўмитаси раиси Ҳамзаев Абдушукур Худойқуловични кўрсатиш таклифи кўриб чиқилган эди. Съездда делегатлар эътиборига Ўзбекистон Экологик партиясидан Ўзбекистон Республикаси Президенти лавозимига номзод этиб, партия Марказий Кенгаши Ижроия қўмитаси раиси Ҳамзаев Абдушукур Худойқулович номзоди тавсия этилди. Ҳамзаев Абдушукур Худойқулович 1973 йил 10 декабрда Сурхондарё вилоятининг Узун туманида зиёли оиласида туғилган. Қишлоқ хўжалик фанлари доктори, профессор. Оилали, уч нафар фарзанди бор. Ўзбекистон Экологик партияси аъзоси.

Абдушукур Худойқулович ўз фаолияти давомида давлат ва жамият бошқаруви, ижтимоий-иқтисодий соҳаларда катта тажриба тўплаган, экология ва атроф муҳит муҳофазаси йўналишида фидойилик кўрсатган тажрибали сиёсатчи ва ташаббускор раҳбар сифатида партиянинг кўп минг сонли аъзолари ва халқ ўртасида катта ҳурмат ва эътиборга эга шахсдир.

Сеъездда Ўзбекистон Республикаси Президентлигига номзод Ҳамзаев Абдушукур Худойқулович ўзининг Сайловолди дастури асосий йўналишларини делегатлар эътиборига ҳавола қилди.

Номзоднинг сайловолди дастурида мамлакатимизда иқтисодиётни ислоҳ қилишга қаратилган бир қатор муҳим ташаббуслар илгари сурилмоқда. Хусусан, пестицидлардан фойдаланишдан воз кечишга йўналтирилган “Яшил Ўзбекистон – 2030" дастурини ишлаб чиқиш, “Яшил виза” дастурини жорий этиш, тармоқлар ва ҳудудларнинг “яшил иқтисодиётга ўтиш индекси”ни ишлаб чиқиш, юк ташишни йирик машиналардан темир йўлларга ўзгартиришга қаратилган чоралар алоҳида эътироф этилди.

Ижтимоий соҳада давлат стоматологик клиникаларини ривожлантириш, шаҳарлар Бош режаларини тузишда камида 30 фоизли яшил майдонлар яратиш талабини мустаҳкамлаш, шаҳарсозлик фаолиятида жамоатчилик назоратини кучайтириш, норматив ҳужжатларни қабул қилишда атроф-муҳитга таъсирини баҳолаш тизимини жорий этиш, бир марталик ишлатиладиган пластик ва полиэтилен таркибли идишлардан фойдаланишдан босқичма-босқич воз кечиш, электрон сигаретларни мамлакатга олиб киришни тақиқлаш, 2030 йилдан бошлаб мамлакатда ички ёнув двигателли енгил автомобилларни сотиш ҳамда уларни четдан олиб киришни тақиқлаш каби эътиборга молик ташаббуслар илгари сурилди. Дастур муҳокамаси жараёнида, шунингдек, қонун устуворлигини таъминлаш, суд-ҳуқуқ соҳасини ислоҳ қилишга қаратилган таклифларга алоҳида тўхталиб ўтилди. Хусусан, экологик қонунчиликни кодификация қилиш орқали Экология, Сув, Ўрмон кодексларни қабул қилиш, “Чиқиндилар тўғрисида"ги янги таҳрирдаги қонунни ҳамда “Аҳолининг экологик маданиятини юксалтириш тўғрисида"ги дастурни қабул қилиш, экологик суғурталаш тизимини ривожлантириш, малакали юридик ёрдам ва хизмат кўрсатиш сифатини ошириш, эколог- хуқуқшуносларни тайёрлаш тизимини такомиллаштириш, барча тизимдаги давлат идоралари фаолиятида, тендерларда, давлат харидларида очиқлик ва шаффофликни кенгайтириш чораларини кучайтириш, маъмурий органлар томонидан жарима қўллашни қисқартириб, судларга кенгроқ ваколат бериш, йўл ҳаракати хавфсизлигини фақат қонун асосида тартибга солишни йўлга қўйиш ва бошқалар.Давлат ва жамият қурилиши соҳасидаги таклифлар ҳам алоҳида эътироф этилди. Жумладан, давлат экологик сиёсатининг устувор йўналишларини белгилашга қаратилган “Барқарор экологик ривожланиш Стратегияси“ ҳамда қайта тикланадиган энергия манбаларини ривожлантириш истиқболларини белгилашга қаратилган “Яшил энергетика Стратегияси”ни қабул қилиш, сувдан самарали фойдаланиш ва унинг маҳсулдорлигини оширишга қаратилган Миллий дастурни ишлаб чиқиш, қатор халқаро ҳужжатларга аъзо бўлиш каби таклифлар шулар жумласидандир. Шундан сўнг, Ўзбекистон Экологик партиясидан Ўзбекистон Республикаси Президентлигига Ҳамзаев Абдушукур Худойқулович номзоди ва унинг Сайловолди дастури делегатлар томонидан атрофлича муҳокама қилинди.

Делегатлар Ўзбекистон Республикаси Президентлигига номзод Абдушукур Ҳамзаевнинг кўп йиллардан буён мамлакатимиз сиёсий, ижтимоий-иқтисодий ҳаётидаги фаол иштироки, олим сифатида олиб бораётган илмий изланиш ҳамда ихтироларига юқори баҳо берди.

Номзоднинг сайловолди дастуридан ўрин олган устувор вазифалар аҳолининг қулай атроф-муҳитга бўлган ҳуқуқларини рўёбга чиқариш, халқимиз ва келажак авлод учун муносиб турмуш шароитларини яратиш ҳамда фаровон жамият барпо этиш мақсади кўзлангани алоҳида қайд этилди. Съезд делегатлари томонидан Ўзбекистон Республикаси Президентлигига номзод этиб кўрсатилган Ҳамзаев Абдушукур Худойқулович ва унинг Сайловолди дастури бир овоздан маъқулланди ва тегишли қарорлар қабул қилинди.

Партия Марказий Кенгаши, ҳудудий партия ташкилотлари ҳамда фаоллари олдига партиянинг сайлов кампаниясини уюшқоқлик билан ўтказишни таъминлаш борасида бир қатор вазифалар қўйилди.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!