Туркия кемаларга қўна оладиган дрон тақдим этмоқда
Туркия апрель ойининг сўнгги кунларида дунёда биринчи бўлиб кемаларда қисқа учиш-қўниш йўлагига келиб қўнадиган ва осмонга парвоз қила оладиган илк учувчисиз ўзи учар қурилмасини намойиш қилади, деб ёзмоқда Anadolu агентлиги.
"Туркиянинг Baykar компанияси 27 апрелдан 1 майгача бўлиб ўтадиган авиация ва космик технологиялар фестивали – TEKNOFEST – 2023 кўргазмасида илк бор Bayraktar TB3 зарбдор дронини намойиш қилади.
Хабарда келтирилишича, мазкур фестиваль Истанбулдаги Отатурк аэропортида ташкил этилмоқда. “TB3 SİHA зарбдор дрони жорий йилда синов парвозларини бошлайди”, – дейилади агентлик тарқатган хабарда.
"Қанотлари букланадиган Bayraktar TB3 кемаларга қўниб, уча оладиган дунёдаги илк қуролланган учувчисиз ўзи учар аппарат бўлади. У Туркия ҳарбий денгиз кучлари флагмани ҳисобланган TCG Anadolu кемасида ҳам учиш-қўниш амалиётини бажара олади. Bayraktar TB3 ҳаракатини жуда узоқ масофадан разведка-кузатув олиб бориш ва зарба бериш мақсадида бошқариш мумкин. Bayraktar TB3 дрони Туркиянинг ҳарбий салоҳиятини мустаҳкамлашга ўзининг муҳим ҳиссасини қўшади”, – дейилади хабарда.