Тошкентдаги меҳмонхоналардан бирида ўғирлик қилган эркак озодликдан маҳрум қилинди

Баъзиларнинг ҳаёт йўлларини кузата туриб, ўйга толасан киши. Қонунни четлаб ўтиб, қинғир йўллар орқали даромад топиш ортидан такрор ва такрор суднинг қора курсисидан жой олиш ва жазога тортилиш жараёнида ақалли бир марта бўлса ҳам ортга назар ташлаб, “умримнинг қанчаси панжара ортида жазони ўташ билан ўтди, уни беҳуда сарф қилмаяпманмикан?” деган саволни ўзига бериб кўрмаса?! 39 ёшли эркак ҳам худди шу тоифадан. Бир неча бор фирибгарлик, ўғрилик жиноятларини содир қилиб, тегишли жазо олган бўлишига қарамай, яна шу “йўл” орқали маблағ топишга уринди.

У муқаддам содир қилган ўғирлик жинояти учун тергов ҳаракатларига жалб қилинди. Тошкентдаги меҳмонхоналардан бирида ўзи билан бирга вақтинча яшаб келган шериги – жабрланувчининг ювиниш хонасига кирганидан, шахсий буюмлари қаровсиз қолганидан фойдаланади. Жабрланувчига тегишли, баҳоси 150.000 сўмлик эркаклар барсеткаси, унинг ичида бўлган 750.000 сўм нақд пул, ҳисобида 6.900.000 сўм маблағлар мавжуд бўлган икки дона банк пластик карталари, баҳоси 50.000 сўмлик флеш-картаси, фуқаролик паспортини яширин ўғирлаб, воқеа жойидан яширинади. Шеригига жами 7.850.000 сўмлик моддий зарар етказиб, фуқаролик паспортини нобуд қилган.

“ЖИНОЯТНИ ПУЛГА МУҲТОЖ БЎЛГАНИМ САБАБЛИ СОДИР ҚИЛДИМ”

Суд мажлисида судланувчи айбига тўлиқ иқрорлигини билдирди...

— Тошкент шаҳрига шахсий ишларим билан боргандим. Вақтинча яшаш учун меҳмонхоналардан бирига жойлашдим. Мен жойлашган хонада аввалроқ келган фуқаро бор эди. У билан ўзаро танишиб, биргаликда овқатланиб, мулоқотда бўлдик. Учинчи куни уйғониб, ювиниб чиқдим. Сўнг хонадошим ҳам ювиниш хонасига кириб кетди. Шунда унинг пулларини ўғирлаш фикри пайдо бўлди. Унга тегишли бўлган эркаклар барсеткасини олиб, меҳмонхонадан чиқиб кетдим. Метро бекати ёнига бориб, барсеткани очиб кўрганимда ичида нақд пуллар, икки дона банк пластик карталари, фуқаролик паспорти борлигини кўрдим. У билан овқатлангани чиққанимизда банк пластик картасининг пин-кодини эшитиб олгандим. Банкомат орқали унинг ҳисобидан 6.600.000 сўм маблағни ечиб олдим. Ўз ишларим билан водийга кетдим. Довонда барсеткани ичида бўлган фуқаролик паспорти ҳамда пластик карталарини отиб юбордим. Барсетка ичида флеш-картани кўрмагандим. Ҳозирда содир қилган жиноятим оқибатларини тушуниб етиб ва бундан пушаймонман. Мазкур жиноятни пулга муҳтож бўлганим сабабли содир қилишга мажбур бўлдим.

“10.000.000 СЎМ МОДДИЙ ВА МАЪНАВИЙ ЗАРАР УНДИРИШНИ СЎРАЙМАН”

Суд мажлисида жабрланувчи қуйидагиларни баён қилди...

— Малака ошириш учун Тошкент шаҳрига келиб, меҳмонхонага жойлашдим. Хона икки кишилик бўлиб, кейинчалик шахсини билганим – хонадошим ҳам хонага жойлашди. У билан ўзаро танишиб, бирга овқатланиш учун чиқиб, мулоқотда бўлдик. Ўша куни уйқудан уйғониб, ювиниш хонасига кириб кетдим. Хонага қайтиб келганимда, унинг чиқиб кетганини билдим. Сўнг ўзим ҳам хонадан чиқиб кетишга ҳозирланиб, жавонга қўйганим – ичида фуқаролик паспортим, 750.000 сўм нақд пул, ҳисобимда 6.900.000 сўм маблағлар бўлган банк пластик картаси, флеш-картаси бўлган баҳоси 150.000 сўмлик барсеткамни олмоқчи бўлдим. Барсеткам жойида йўқлигини билдим ва дарҳол меҳмонхона маъуриятига нарсаларим йўқолганини айтдим. Ашёларимни хонада бирга яшаган хонадошим ўғирлаган бўлиши мумкинлигини ҳам қўшиб қўйдим. Меҳмонхона маъмурияти унинг сумкаси меҳмонхонада қолганини ва қайтиб келиши мумкинлигини айтиб, уни кутишни таклиф қилишди. Шундан сўнг пластик картам қолдиғини кўрганимда, ҳисобимда 55.000 сўм қолганини кўриб, ҳолат юзасидан ички ишлар идораларига хабар бердим. Ҳозирда менга етказилган моддий зарар ўрни умуман қопланмаган, фуқаролик паспортим ҳам қайтарилмаган, судланувчидан фойдамга 10.000.000 сўм моддий ва маънавий зарарни ундириб ва унга қонунда назарда тутилган жазо тайинлашни сўрайман.

ҲУКМ ЎҚИЛДИ

Cудланувчи ЖК 169-моддаси 3-қисмининг “а” банди, 227-моддаси 2-қисмининг “а” бандида назарда тутилган жиноятларни содир этганликда айбли деб топилди.

ЖКнинг 59-моддаси 8-қисми тартибида судланувчи 2020 йилдаги ҳукм билан тайинланган 3 йил 6 ой муддатга озодликдан маҳрум қилиш жазосини қисман қўшиш йўли билан узил-кесил 5 йил 6 ой муддатга озодликдан маҳрум қилиш жазоси тайинланди. Жазони қаттиқ тартибли колонияда ўташ белгиланди.

Судланувчидан жабрланувчига 10.000.000 сўм моддий ва маънавий зарар ундирилиши белгиланди.

Илгизар Сабиров, жиноят ишлари бўйича Чилонзор туман суди раиси