Тошкент вилоятида салкам 2 млрд сўмлик заргарлик буюмларини божхонадан олиб ўтмоқчи бўлган шахслар ушланди
Тошкент вилоятида заргарлик буюмларини ноқонуний йўл билан олиб ўтмоқчи бўлган шахслар қўлга олинди. Бу ҳақда вилоят божхона бошқармаси матбуот хизматига таяниб Дарё нашри хабар берди.
Қайд этилишича, божхоначилар томонидан Тошкент вилояти Давлат хавфсизлик хизмати ходимлари билан ҳамкорликда қимматбаҳо металлардан ясалган заргарлик буюмларининг ноқонуний айланмасига чек қўйилган.
“Бекобод-авто” чегара божхона постига пиёда ҳолда кириб келган икки нафар фуқаро божхона ходимлари томонидан белгиланган тартибда шахсий кўрикдан ўтказилганида фуқароларнинг бел қисмига матога ўраб яширилган умумий қиймати салкам 2 миллиард сўмлик 1 696 грамм заргарлик буюмлари борлиги аниқланган.
Ҳозирда ушбу ҳолат юзасидан суриштирув ҳаракатлари олиб борилмоқда.
Эслатиб ўтамиз, 2023 йил апрель ўрталарида Ҳиндистонда Индира Ганди аэропортидан 3,2 килограмм олтинни ноқонуний олиб ўтмоқчи бўлган ўзбекистонлик эркак ушланган эди. Ўзбекистон фуқароси Дубай рейсини амалга ошириш учун Чандигарҳ аэропортига қочиб кетган пайти қўлга тушган. 2024 йилнинг май охирларида эса Тошкент вилоятида 1 млрд 770 млн сўмлик заргарлик буюмларини автобусда яширинча олиб кириш ҳолати аниқланганди.
