Тизимли ишлар ўз самарасини беради
Мамлакатимизда ичимлик суви таъминоти йилдан йилга яхшиланмоқда. Сувнинг узлуксиз етказилишида “Ўзсувтаъминот” акциядорлик жамияти томонидан амалга оширилаётган тизимли ишлар муҳим аҳамият касб этмоқда. Чекка ҳудудлар, ҳаттоки тоғли туманларга ҳам оби ҳаётни етказиб бериш доимо назоратда.
2024 йил якунига қадар давлат бюджетидан ажратилган 1 триллион 40 миллиард сўм маблағ ҳисобига 141 та объектда қурилиш-монтаж ишларини амалга ошириш белгиланган. Жорий йилнинг биринчи чорак якуни бўйича 230,2 миллиард сўм маблағ ўзлаштирилиши ҳисобига 192,9 километр ичимлик ва 45,2 километр оқова сув тармоқлари, 14 та ичимлик ва 4 та оқова сув иншоотларида қурилиш-монтаж ишлари бажарилган. Шунингдек, Инвестиция дастури доирасида 76 та объектда қурилиш-монтаж ишларини бажариш учун ажратилган 909 миллиард сўм маблағдан биринчи чоракда 213,1 миллиард сўм ўзлаштирилди. Натижада 170,5 километр ичимлик ва 23 километр оқова сув тармоқлари, 14 та ичимлик ва 2 та оқова сув иншоотларида қурилиш-монтаж ишлари амалга оширилди.
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида “Ўзсувтаъминот” АЖ ахборот хизмати раҳбари Акмал Муродов иштирокида ўтказилган брифингда шулар ҳақида батафсил маълумот берилди.
Қайд этилишича, янги ташкил этилаётган Саноат зоналаридаги 12 та объектда ташқи ичимлик ва оқова сув тизимларини барпо этиш учун Давлат бюджетининг 47,1 миллиард сўм маблағи ҳисобидан 4,3 километр ичимлик, 11 километр оқова сув тармоқлари қурилган. Бундан ташқари, Ўзбекистон Республикаси Вазирлар Маҳкамасининг Раёсат баёнига асосан жорий йилда қурилиш-монтаж ишларини бажариш учун 53 та объектда умумий қиймати 84 миллиард сўмлик ишларни амалга ошириш белгиланган бўлиб, 9,3 миллиард сўм маблағни ўзлаштириш ҳисобига 18,1 километр ичимлик ва 11,2 километр оқова сув тармоқлари ҳамда 2 та оқова сув иншоотида қурилиш-монтаж ишлари олиб борилган.
Жорий йилда Инвестиция дастури доирасида жами 308,2 миллион АҚШ доллар миқдоридаги маблағлар ўзлаштирилиши ҳисобига 20 та лойиҳани амалга ошириш белгиланган. Ўзлаштирилган маблағларнинг асосий қисми Осиё тараққиёт банки, Европа тикланиш ва тараққиёт банки, Осиё инфратузилма инвестициялар банки, ОПЕК жамғармаси ҳиссасига тўғри келди.
Маблағлар ҳудудлар кесимида Тошкент, Наманган, Бухоро вилоятлари, Тошкент шаҳри ва Қорақалпоғистон Республикасига йўналтирилган.
Шунингдек, жорий йилда жами 452 километр ичимлик ва 110 километр оқова сув тармоғи, 8 та ичимлик ва 1 та оқова сув иншоотларини қуриш ҳамда реконструкция қилиш режалаштирилган.
Жорий йил биринчи чорак якуни ҳолатига республика бўйича дебитор қарздорлик жами 979,9 миллиард сўмни ташкил этган.
“Ўзсувтаъминот” АЖ ва унинг ҳудудий сув таъминоти корхоналари томонидан 106 та бино ва иншоотларга жами 714,5 кВт ли қуёш панеллари ўрнатилиб, 351 миллион сўмлик электр энергияси иқтисод қилинган.
Акциядорлик жамияти ва унинг ҳудудий коррупцияга қарши курашиш комплаенс назорат хизмати томонидан ўтказилган 34 та ўрганишда аниқланган коррупцион вазиятлар билан боғлиқ қонун бузилиш ҳолатлари 3 минг 553 тани ташкил этган. Уларда 29,7 миллиард сўмлик молиявий хатоликлар йўл қўйилгани аниқланган. Бундан ташқари, ҳисобот даври якуни бўйича жами 7 715 та мурожаат келиб тушган. Шундан 76,6 фоизи ижобий ҳал этилган. Қолган мурожаатлар юзасидан тизимли равишда ўрганиш ишлари амалга оширилмоқда.
Маълумотларга кўра, 2024 йил январь ҳолатида аҳолининг марказлашган ичимлик суви билан таъминланганлик даражаси 77,2 фоизни ташкил этган.
Ичимлик суви тарифлари арзонлиги ундан хўжасизларча фойдаланиш, ичимлик сувига беписандлик билан муносабатда бўлишга олиб келмоқда. Соҳадаги мавжуд вазият аҳолини сув билан таъминлаш масалаларида бозор нархлари механизмларига ўтиш заруратини тақозо қилди. Бу эса соҳага инвестицияларни жалб этиш, мавжуд қувватларни модернизация қилиш ва янгиларини қуриш имконини беради.
Амалга оширилаётган тизимли ишлар аҳолини тоза ичимлик суви билан таъминлаш бўйича хизматлар сифатини янада оширишга хизмат қилади.
