Тимсоҳлар дарёсида Олимпиада беллашувлари ўтказилиши мумкин

2032 йили Австралиянинг Брисбен шаҳрида бўлиб ўтадиган Олимпия ва Паралимпия ўйинлари ҳозирданоқ омма орасида турли муҳокамаларга сабаб бўлмоқда.

The Courier Mail'нинг хабар беришича, 4 йилликнинг энг нуфузли турнирида Брисбендан унчалик узоқ бўлмаган Рокҳэмптон шаҳрининг Фицрой дарёсида эшкак эшиш бўйича беллашувлар ўтказилиши режалаштирилган. Қизиқ томони, дарёда йирик тимсоҳлар мавжуд бўлиб, маҳаллий ҳукумат сувда ўтадиган мусобақаларни бошқа ҳудудга кўчириш молиявий йўқотишларга сабаб бўлади, деган фикрда.

Квинсленд штати маъмурлари эшкак эшиш беллашувлари бўлиб ўтадиган жойларни бир неча кун ичида эълон қилиши кутилмоқда.

Австралия эшкак эшиш федерацияси бош директори Сара Кук ушбу объектни спортчилар учун хавфли оқимлар йўқлиги ва мусобақа ўтказиш учун қолган жойларга қараганда қулайроқ эканлиги билан изоҳлади. Бироқ Кук бу борада ҳали тегишли халқаро федерациялар ёки Халқаро олимпия қўмитаси билан маслаҳатлашмаган. Кукнинг айтишича, Фицрой дарёси эшкак эшувчилар ичида анчайин машҳур бўлиб, бу ердаги тимсоҳлар чет элликларни ҳайратда қолдириши ва мухлисларга ўзгача завқ улашиши мумкин.

Лондон Олимпиадаси совриндори Алексей Коровашков тимсоҳлари бўлган ҳавзада мусобақаларда иштирок этишни истамаслигини айтиб ўтди: «Бундай миқёсдаги турнирлар учун ёввойи табиатдан узилган махсус эшкак эшиш каналларини қуриш керак. Масалан, Москвада ўтказилган 1980 йилги Олимпия ўйинлари учун ҳам махсус канал олдиндан қазилган», — деди каноэчи.

«2032 йилги Олимпия ўйинлари учун Фицрой дарёсини танлаш режалари биринчи марта январ ойида муҳокамага қўйилганди. Эшкак эшиш мусобақалари дастлаб Брисбендан узоқроқда жойлашган Виаралонг тўғонида ўтказилиши режалаштирилган эди, аммо Брисбендан у ерга бориш учун янги йўл қурилиши, электр энергияси ва шунга оид бошқа инфратузилма имкониятларини йўлга қўйиш талаб этилади. Бироқ мусобақаларни Фицрой дарёсида олиб бориш анча арзонга тушади», — деди Квинсленд сенатори Мэтт Канаван.