Спикер ўринбосари А.Хаитов халқ ичида...

Мамлакатимизда инсон ҳуқуқ ва манфаатларини ҳимоя қилиш, аҳолига муносиб меҳнат ва яшаш шароити яратиш борасида изчил ислоҳотлар амалга оширилмоқда. Энди ҳар бир раҳбар, депутатлар халқ дарди билан яшаб, одамларни қийнаётган муаммоларни ҳал қилиш учун фидойилик кўрсатиб бошқаларга ўрнак бўлиши керак. Фақат шундагина у халқ ишончини қозониши, партия обрўсини ошириши мумкин.

Шу маънода Олий Мажлис Қонунчилик палатасининг бир гуруҳ  депутатлари O‘zLiDeP фракцияси раҳбари, спикер ўринбосари А.Хаитов бошчилигида халқ билан мулоқот қилиш, одамларнинг дардини эшитиш, жойлардаги ҳақиқий аҳволни ўрганиш мақсадида Қашқадарё вилоятига боришди.

Воҳада ўтказилган учрашувлар доирасида депутатлар гуруҳларга бўлинган ҳолда вилоятдаги корхона, ташкилот, муассаса ва аҳоли хонадонларида бўлишиб, мавжуд реал вазиятни ҳар томонлама чуқур ўрганмоқда, сайловчилар билан юзма-юз мулоқот қилмоқда.

Спикер ўринбосари А.Хаитов воҳага ташрифи доирасида Деҳқонобод тумани ҳокими қабулига келган юздан ортиқ фуқаролар билан мулоқот қилди. Хусусан, ўтган давр мобайнида тумандаги ишсиз аҳоли бандлигини таъминлаш мақсадида томорқа хўжалиги, чорвачилик, иссиқхона ва ҳунармандчиликни ривожлантириш мақсадида 1 млрд. 200 млн. сўм кредит ажратилганини, 200 ўринли жунни қайта ишлаш корхонаси ишга туширилганлиги, лалмикор майдонларга экиш учун Жанубий Кореядан ток кўчати, Хитойдан картошка уруғлик келтириш борасида амалий ишлар бошланганлигини, бу  йил туманда оилавий тадбиркорликни ривожлантириш мақсадида юзга яқин хонадонда томчилатиб суғоришга асосланган замонавий иссиқхонани ишга тушириш режалаштирилганини таъкидлади.

Ўз навбатида, деҳқонободлик сайловчилар ёшларни ишсизлик қийнаётгани, аҳолининг табиий газ таъминоти қониқарсиз экани, кадастр ҳужжатларини расмийлаштиришда бюрократик тўсиқларга дуч келаётгани, тоғолди қишлоқ йўллари яроқсиз ҳолга тушиб қолгани, ёш тадбиркорларни қўллаб-қувватлаш борасидаги ишлар талабга жавоб бермаслигини билдирдилар.

Партия етакчиси сайловчиларни қийнаётган муаммолар – бандлик, ер кадастри, газ, ичимлик суви, йўл ва бошқа масалаларни ўрганди, мурожаатларнинг салмоқли қисми шу ернинг ўзида ҳал этилган бўлса, вақт талаб қиладиган муаммолар назоратга олинди.

“Менинг жойим бор, устахонани ҳам ўз кучим билан қураман, фақат  ускуналар харид қилиш учун банкдан кредит олишда ишчи гуруҳидан кўмак сўрадим, – дейди тумандаги “Деҳқонобод” маҳалла фуқаролар йиғини ҳудудида яшовчи тадбиркор Ибодат Неъматова. – Партия вакиллари бу масалада банк раҳбарлари билан маслаҳатлашиб, масалага ечим топди. Бундан мен жуда хурсанд бўлдим”.

Шунингдек, “Моҳмирза” фермер хўжалиги раҳбари Бозоргул Каримова чорва моллари боқиш учун яйловлар қисқариб бораётгани, тиббиёт коллежини битирган Меҳринисо Намозова иш топишда қийналаётгани ва Сабоҳат Бозорова узоқ йиллардан буён фарзандларига алимент пули ололмаётгани ва шу каби бошқа бир қатор фуқаролардан тушган мурожаатлар жойида ўрганилиб, зарур чора-тадбирлар белгиланди.

Таъкидлаш ўринлики, саломатлик инсоннинг энг қиммат бойлиги ҳисобланади. Шу боис охирги уч йилда Президентимиз раҳнамолигида соғлиқни сақлаш тизимини ислоҳ қилиш, аҳолига малакали тиббий хизмат кўрсатиш сифати ва самарадорлигини юксалтириш борасида изчил ислоҳотлар амалга оширилди. Нафақат шаҳар ва туман марказларида, балки чекка қишлоқларда ҳам замонавий тиббиёт муассасалари барпо этилиб, зарур жиҳозлар билан таъминланди.

А.Хаитов бошчилигидаги бир гуруҳ депутатлар шу куни Деҳқонобод тумани тиббиёт бирлашмасида бўлиб, муассасадаги шароитлар билан танишди, бу ерда беморлар учун яратилган қулайликларни кўздан кечирди.

Шифокорлар билан мулоқотда малакали шифокорлар етишмаслиги, “Белибойли” ва “Обод” маҳалла фуқаролар йиғинларида қишлоқ врачлик пунктлари йўқлиги  туфайли  аҳоли узоқ масофага қатнаб, касалликка ташҳис қўйиш ва даволаниш учун сарсон бўлаётгани қайд этилди. Депутатлар томонидан бу каби масалалар чуқур ўрганилиб, муаммоларни бартараф этиш бўйича аниқ таклифлар ишлаб чиқилди.

Олий Мажлис Қонунчилик палатасининг бир гуруҳ депутатлари O‘zLiDeP фракцияси раҳбари А.Хаитов раҳбарлигида тумандаги энг оғир, энг чекка ҳудудларга чиқиб, маҳаллама-маҳалла, уйма-уй юрди. Ўз томорқасида иссиқхона ташкил этиб, тадбиркорлик фаолиятини бошламоқчи бўлган фуқароларга зарур тавсиялар, маслаҳатлар берди.