Сенат Ўзбекистонда исломий банк фаолиятини жорий этишга қаратилган қонунни маъқуллади

Олий Мажлис Сенатининг ялпи мажлисида Ўзбекистонда исломий банк фаолиятини жорий этишга қаратилган қонун лойиҳаси муҳокама қилинди.

Қонунга мувофиқ:
➖ исломий банк фаолиятини амалга ошириш учун алоҳида лицензия тури жорий этилади;
➖ банкларга тўлиқ исломий банк сифатида ёки анъанавий ва исломий банк хизматларини биргаликда кўрсатиш имконияти берилади;
➖ Марказий банк ва тегишли банкларда Исломий молия кенгашлари ташкил этилади;
➖ Солиқ кодексига исломий молия операциялари бўйича алоҳида солиқ тартиби киритилади, айрим операциялар ҚҚСдан озод этилади.

Сенаторлар фикрича, ушбу қонун молиявий хизматлар қамровини кенгайтиради, рақобат муҳитини яхшилайди ва банк-молия соҳасига янги стратегик инвесторларни жалб этишга хизмат қилади.

Мазкур Қонун билан 2 та кодекс ҳамда 7 та қонунга исломий банк фаолиятини амалга оширишнинг ҳуқуқий асосларини белгиловчи янги нормалар билан тўлдирилади.

Муҳокама якунларига кўра, қонун маъқулланди. Эндиликда имзолаш учун Президентга киритилади.