Россия Европага газ етказиб бериш бўйича АҚШни ортда қолдирди
Европа Иттифоқи Украинадаги уруш шароитида Россия энергетикасига қарамликни камайтиришга қаратилган саъй-ҳаракатларига қарамай, Европада Россиядан газ импорти май ойида деярли икки йил ичида биринчи марта АҚШ етказиб беришидан ошиб кетди.
Биз бошдан кечирган барча ишлар ва энергия таъминотидаги хавфни камайтириш учун қилган барча уринишларимиздан сўнг Европа бозорида Россия газининг улуши ортиб бораётганини кўриш ҳайратланарли, — дея Financial Times ICIS консалтинг компаниясининг газ таҳлили бўлими раҳбари Том Марзек-Мансердан иқтибос келтиради.
Россия-Украина уруши бошлангач ва Москва Европага қувур орқали газ етказиб беришни қисқартирганидан сўнг, минтақа суюлтирилган табиий газга (СТГ) таянган. Нашрга кўра, АҚШ унинг асосий етказиб берувчисига айланган.
Қайд этилишича, 2022 йил сентябрь ойида Қўшма Штатлар Европага газ етказиб бериш бўйича Россиядан ўзиб кетган. 2023 йилдан бери Америка Европадаги барча харидларнинг бешдан бир қисмини ташкил қилган.
ICIS статистикасига кўра, 2024 йил май ойида Россиядан етказиб берилган газ Европа Иттифоқи мамлакатлари, Буюк Британия, Швейцария, Сербия, Босния ва Герсеговиня ҳамда Шимолий Македония Республикасига етказилган умумий газ ҳажмининг 15 фоизини ташкил этган. Шу билан бирга, АҚШ томонидан худди шу давлатларга етказиб берилган СТГнинг май ойидаги даражаси 14 фоизни ташкил этган.
Май ойидаги етказиб беришлар айрим омиллар, жумладан, АҚШдаги йирик экспорт қилувчи СТГ корхонасидаги авария ҳамда Россия июнь ойида режалаштирилган таъмирлаш ишлари олдидан Туркия орқали кўпроқ газ ўтказиш ҳолатлари таъсир қилган, — дейилади хабарда.
