Қорабоғда вазият жиддий: Россия ТИВ томонларни зудлик билан ўт очишни тўхтатишга чақирди

Россия Ташқи ишлар вазирлиги Тоғли Қорабоғ можароси томонларини зудлик билан ўт очишни бас қилишга чақирди.

Баёнотда ёзилишича, Тоғли Қорабоғ ҳудудида вазият кескинлашган. Ҳар иккила томондан ўққа тутиш кузатилмоқда. Қурбонлар ҳақида маълумотлар бор.

“Томонларни зудлик билан ўт очишни бас қилишга ва вазиятни барқарорлаштириш мақсадида музокараларга ўтишни чақирамиз”, - дейилган Россия ташқи сиёсий идораси баёнотида.

Аввалроқ, Озарбайжон Мудофаа вазирлиги Арманистон қуролли кучлари Қорабоғда туташ чегаралардаги аҳоли пунктини ўққа тутганини маълум қилган эди. Ушбу маълумотларга кўра, аҳоли орасида қурбонлар бор. Арманистон Мудофаа вазирлиги баёнотига кўра, Қорабоғ “ҳаво ва ракета ҳужумларига” учраган. Арман томони Озарбайжоннинг иккита вертолёти ва учта учувчисиз учиш аппаратини уриб туширганини хабар қилди.