Қатар ОПЕК сафига қайтадими?

Қатар Нефт экспорт қилувчи мамлакатлар ташкилоти (ОПЕК) сафига қайтишни режалаштирмаяпти. ТАССнинг хабар беришича, бу ҳақда мамлакат Энергетика вазири Саад ал-Каабий маълум қилди.

“Айтганимиздек, биз ОПЕКдан газ мамлакати бўлганимиз, бизда нефт қазиб олиш камлиги сабабли чиқиб кетганмиз. Шунинг учун ОПЕК таркибида қолишимиздан маъни йўқ. Бу биз қабул қилган қарор ва уни қайта кўриб чиқмаймиз”, – деди вазир.

Қатар ОПЕКка 1961 йилда қўшилган бўлиб, 2019 йилнинг 1 январида ташкилотни тарк этди ва асосий эътиборини газ қазиб олишга қаратишга қарор қилди.

Каабийнинг айтишича, айни пайтда газ нархининг баландлигини газ секторига инвестициянинг камлиги билан изоҳлаш мумкин. “Ички газ инфратузилмасига катта маблағ киритиш борасида Доханинг қарори қатъий. Газга талаб ортиб бормоқда, бироқ барчанинг талабини қондиришнинг иложи йўқ”, – деди у.
Қатар суюлтирилган газ экспорт қилиш бўйича дунёда етакчи ўринда туради.