Покистон Эрдоғанни Нобель мукофотига номзод қилиб кўрсатди

Покистон Сенати Туркия Президенти Режеп Таййип Эрдоғанни Украина инқирозини ҳал қилишдаги саъй-ҳаракатлари сабабли Тинчлик учун Нобель мукофотига номзод қилиб кўрсатди.

Бу ҳақда Покистон қонун чиқарувчи ҳокимиятга таяниб, “Анадолу” агентлиги хабар берди.

“Тинмас саъй-ҳаракатлар, ҳар икки томон билан ўз вақтида ва самарали ҳамкорлик қилиш туфайли Эрдоған Украина атрофидаги глобал фалокатнинг олдини олди”, дея Покистон Сенати раиси Муҳаммад Содиқ Санжранийнинг Норвегия Нобель қўмитасига йўллаган мурожаатидан иқтибос келтирди агентлик.

Туркия Буюк миллат мажлиси спикери Мустафо Шентоп ўтган ҳафта Эрдоғанни Тинчлик бўйича Нобель мукофотига кўрсатиш ташаббуси билан чиққан эди.