Олис қишлоқ аҳолиси: “Газ дегани жоннинг роҳати экан”
“Hududgaz Surxondaryo” газ таъминоти филиали ахборот хизмати “Олис манзиллар” лойиҳаси доирасида вилоятнинг энг чекка ва олис қишлоқларида яшайдиган аҳолига суюлтирилган газ баллонларининг етказилиши, хизматлар кўрсатиш даражасини ўрганмоқда. – Ўтган қисқа даврда лойиҳа доирасида вилоятнинг Сариосиё, Узун ва Бойсун туманларидаги ўнга яқин тоғли, энг олис маҳаллаларда бўлиб, истеъмолчилар билан учрашдик, – дейди “Hududgaz Surxondaryo” газ таъминоти филиали ахборот хизмати раҳбари Азиз Машрабов. – Уларнинг суюлтирилган газ таъминоти билан боғлиқ фикрларини эшитдик. Мутахассисларимизнинг олис ва чекка ҳудудлардаги мижозларга хизмат кўрсатиш жараёнини кузатдик. Осмонўпар тоғлар қўйнидаги айрим қишлоқларга, айниқса, қиш фаслида газ баллонларини етказиб бериш машаққатларига гувоҳ бўлдик.
Шу баҳона вилоят марказидан жуда олисда яшайдиган одамларнинг бугунги ҳаёт тарзи билан ҳам танишяпмиз. Олам кенг, манзиллар кўп, одамлар турфа. Юрт кезиб, эл таниб, фикр қилиб яшашнинг завқи ўзгача экан. Манзил-у маконлар ичра шундайлари борки, у ерда бир кунгина яшасангиз бас, одамларининг самимий муомаласи ва шукрона ҳисси сизга ҳам юққандек бўлади. Шуурингизда аллақандай позитив, енгиллик уйғонганини сезасиз. Бойсун туманидаги Шифо булоқ маҳалласи Қашқадарё вилояти чегарасида Термиз шаҳридан 200 чақирим олисда жойлашган. Маҳаллада 370 дан ортиқ газ истеъмолчиси яшайди. Лойиҳа иштирокчилари ва “Бойсунтумангаз” газ таъминоти бўлими ходимлари маҳаллага суюлтирилган газ баллонлари юкланган автомашина билан борди.
Маҳаллий аҳолининг айтишича, тоғлар қўйнидаги бу гўша Шифобулоқ, деб номланишининг рамзий маъноси бор. Қишлоқдаги булоқ суви қадимдан турли тери касалликларига шифои-комил бўлиб келган. Ана шу турдаги касалликка чалинган инсонлар булоқ суви ёрдамида дардига малҳам топган. – Қишлоққа Бойсун тумани марказидан келин бўлиб тушганман, – дейди Бибисора момо Бобомуродова. – 70 ёшдаман. Дастлабки йилларда хонадонлар ўртасида девор йўқлиги, аёлларнинг меҳнаткашлиги, қўни-қўшнининг бир-бирига оқибатидан ҳайратда қолганман. Энди барчасига кўникиб кетдим. Айниқса, кейинги йилларда маҳалламиз тубдан ўзгариб, турмуш шароитимиз яхшиланди. Масалан, яқин йилларгача биз ёз фаслида қиш учун ўтин ғамлардик. Мана энди суюлтирилган газ билан узлуксиз таъминландик. Бундай бўлишини хаёлимизга келтирмаганмиз. Барчаси учун раҳмат. Атрофи осмонўпар тоғлар билан ўралган туманда шундай маҳаллалар борки кўчаларида автотранспорт воситасида юришнинг ўзи жуда мушкул иш. Шу боис газ идораси ходимлари истеъмолчиларга сифатли хизмат кўрсатиш учун махсус аравалар ташкил этган. Мазкур маҳалла хонадонларига ҳам газ баллонлари ана шундай махсус аравалар орқали етказиб берилади. – Ҳар 35-40 кунда суюлтирилган газ баллонларимизни алмаштириб туришади, – дейди Гулхол Исмоилова. – Тағин ҳам аравада уйимизга келтириб, ўрнатиб қўйишади. Ўқитувчи бўлиб ишлайман.
Бундан беш-олти йил аввал ишдан кейин тоғу-сойлардан ўтин йиғишга кетардим. Ўтинни эшакка юклаб уйга олиб келар эдим. Газ, дегани жоннинг роҳати экан. Ишдан ҳориб келсангиз бир зумда овқатингиз пишади, чойингиз қайнайди. Инсон манфаатлари олий қадрият даражасига кўтарилган мамлакатимизда ёшу-кексанинг ҳаётдан рози бўлиб яшаши учун барча шароит яратилмоқда. Бу жараёнда олис, чекка ҳудудларда яшаётган юртдошларимизга ҳам алоҳида эътибор қаратилаётгани қувонарлидир. Туман газ таъминоти бўлими ходимлари маҳалла истеъмолчиларига олиб келган газ баллонларини тарқатиб бўлгунича олис, чекка манзилда яшаётган одамлар билан суҳбатлашдик. Уларнинг турмуш тарзи, юз бераётган ўзгаришларга муносабати билан қизиқдик. – Газ баллон айниқса, аёлларимиз учун ҳузури жон бўлди, – дейди Абутолиб Шералиев. – Ўчоққа ўтин қалаб, чой қайнатмайди, овқат пиширмайди. Суюлтирилган газни лип эткизиб ёқиб қўйса бас, барчаси бир пасда муҳайё бўлади. Бундан ташқари, хонадонларимизга тоза ичимлик сув қувурларини ҳам тортиб беришган. Йўлларимиз яхшиланмоқда. Хизматлар кўрсатиш йил сайин ўсиб бормоқда. Бу каби ободлик ва тўкинликка фақат шукрона айтиш керак. – Энди масаланинг яна бир томони бор.
Ҳар йили қанча дов-дарахт ўтин учун кесилмай, сақлаб қолинаётганини айтмайсизми, – дея гурунгга қўшилади Эшназар Сафаров. – Бундан беш-олти йил аввал шаҳарга тушиб қолсак, гапнинг тўғриси уларга яратилган шароитларга ҳавасимиз келар эди. Газ, сув бор, электр энергия деярли ўчмайди. Уйининг ёнгинасида озиқ-овқатидан тортиб, кийим-кечагигача бўлган дўкон. Ўшанда қачон бизнинг маҳаллада ҳам шунга ўхшаш шароитлар яратилар экан, деган ўйга толардик. Мана, эндиликда яшашимиз шаҳарникидан қолишмай қолди. Бу ишларнинг ташаббускори бўлган Президентимизга раҳмат. Илоҳим, мамлакатимиз тинч, юртимиз обод бўлаверсин. Лойиҳа доирасида газчилар хонадонларга суюлтирилган газ баллонларини ўрнатиб, созлигини назоратдан ўтказди. Хавфсиз фойдаланиш тартибларини тушунтирди. “Hududgaz Surxondaryo” газ таъминоти филиали мутасаддилари истеъмолчиларнинг хизматлар кўрсатиш билан боғлиқ фикр-мулоҳазалари, таклиф ва тавсияларини тинглади.
