Ноҳалол бойлик ортидан қувганлар жазога тортилди

Бу ҳаётда одамзотнинг афсус-надомат ичида яшамаслиги нафақат унинг нияти, хулқига, балки нафс амрига қулоқ тутмаслигига боғлиқ. Инсон қачон нафсига бўйсунади? Виждон юзига парда тортилганида, инсофу- диёнатдан, иймондан йироқлашганида...

Суд залида 3 нафар маҳкум, боши эгик, айбига иқрор, пушаймон...

Х.Холиков, “Galvanik technology systems” МЧЖда ишчи вазифасида ишлаб келиб, ушбу жамиятга тегишли “Никел пластинкалар”ни яширин равишда талон-торож қилиш мақсадида, мазкур жамиятда ишчи вазифасида ишловчи О.Озодов билан олдиндан жиноий тил бириктириб, МЧЖнинг Яшнобод туманида жойлашган омборига кечки вақтда винтиляция қувири орқали ғайриқонуний равишда кириб, омбордаги жами 500 кг. никел пластинкаларини ташқарига олиб чиққунга қадар бўш паддонларга яшириб,  бўш паддонларни ушбу жамиятга кириб-чиқишга рухсат этилган “AVР” МЧЖда ҳайдовчи А.Хайитов билан олдиндан келишган режага асосан, унинг бошқарувидаги “Исузу” русумли юк машинасига юклаб, МЧЖ ҳудудидан ташқарига олиб чиқиб, сотиб юборишган ва пулларни учга бўлишиб, ўзларининг эҳтиёжларига ишлатишган.

Ҳар қандай жиноий қилмишнинг поёни бўлади. Бу гал ҳам худди шундай бўлди. Суд, давлат айбловчисининг хулосасини, ҳимоячилар фикрини, судланувчиларни, жабрланувчи ва гувоҳларнинг кўрсатувларини тинглаб, жиноят иши ҳужжатларини ўрганиб чиқиб, Х.Холиков, О. Озодов, А.Хайитовни жиноят содир этганликдаги айбли деб топиб қонун санкциясида кўрсатилган жазони тайинлади.

Ҳаётнинг қатъий қонунияти бор: инсон ўз ҳаёт йўлида нотўғри ташланган ҳар бир қадами, ўз умрининг ҳар бир лаҳзасига масъулиятсизлик билан қараши ҳеч қачон изсиз ва жавобсиз қолмайди.

Анвар Икромов,

Жиноят ишлари бўйича Яшнобод туман суди судьяси