Кредитни тўлай олмаган тадбиркор ёки «план»ни бажара олмаган фермер энди қамалмайди

Айнан мана шу норма ўзгараётган Конституциянинг 25-моддасида акс этмоқда. Яъни, «Ҳеч ким шартномавий мажбуриятларни бажара олмаганлигига асосланиб жиноий жавобгарликка тортилиши мумкин эмас».

Тадбиркорлик озми кўпми таваккалчиликка асосланган бўлади. Бугун иш бошлаб эртасига касодга учраган, олган қарзини тўлай олмасдан жазоланган чорасизлар сони кам эмас. Чунки ҳозирги тартиб шундай – ким ёпмаган қарзини тўламаган бўлса, жиноий жавобгарликка тортилмоқда. «Буни қамасак у олган пулларни ким қайтаради», деган саволга эса жавоб йўқ.

Ёки ноқулай келган об-ҳаво, сувнинг вақтида берилмагани сабаб «план»ни бажара олмаган фермер билан ҳам худди шундай ҳолат.

Қарз учун қамаш – бу қайсидир маънода мантиқсизлик. Аслида жавобгарлик қарздорнинг шахсига эмас, унинг молк-мулкига қаратилиши керак.

Конституцияга киритилаётган янги тартиб рискка бораётган тадбиркор ёки бизнес эгасига кичик бўлсада кўмак вазифасини ўташи тайин.