Келаси йили ҳам Ўзбекистон-Британия университетлари форуми бўлиб ўтади
20 ноябрь куни Олий таълим, фан ва инновациялар вазирлигида вазирнинг биринчи ўринбосари Комилжон Каримов ва Вестминстер университети (Лондон) президенти Питер Бонфилд ўртасида учрашув бўлиб ўтди.
Мулоқот давомида томонлар Тошкентдаги халқаро Вестминстер университетининг фаолияти ва уни янада такомиллаштириш масалаларини муҳокама қилдилар. Республикамиз олий таълим тизимида Буюк Британиянинг илғор тажрибаси қўлланилишини янада кенгайтириш жараёнида Вестминстер университетининг иштироки юзасидан фикр алмашилди.
Питер Бонфилд куни кеча бўлиб ўтган Тошкентдаги халқаро Вестминстер университетининг битирувчиларига дипломлар топшириш маросимидан олган илиқ таассуротлари билан бўлишди. “Битирувчиларимиз Вестминстер университети дипломи билан мамлакатдаги йирик компания ва ташкилотларда фаолият юритмоқдалар, мустақил тарзда ўз бизнесини йўлга қўймоқдалар. Албатта, биз таълим берган битирувчилар меҳнат бозорида ўзининг муносиб ўрнини топиши биз учун муҳимдир,” – дея таъкидлаб ўтди Бонфилд.
Маълумот учун, 2022/2023-ўқув йилида Тошкентдаги халқаро Вестминстер университетини жами 1200 нафар талаба битириб, Буюк Британиянинг Вестминстер университети дипломини қўлга киритди.
Шунингдек, музокарада Вестминстер университети билан истиқболли ҳамкорлик йўналишлари қаторида Ўзбекистон университетлари рейтингларини янада яхшилашда экспертлик маслаҳатларини бериш, республика университетларининг инглиз олий таълим муассасалари билан янада яқинлашувида кўмаклашиш таклиф этилди.
Суҳбат якунида жорий йил 2–3-март кунлари Тошкентдаги халқаро Вестминстер университетида бўлиб ўтган Ўзбекистон-Британия университетлари форумининг самарали натижасини эътироф этган ҳолда, уни 2024-йилда ҳам ташкил этишга келишилди.
Маълумот ўрнида, Вестминстер университети Буюк Британия Таълим вазирлиги томонидан юритиладиган “Теачинг Эхcелленcе Фрамеwорк – ТЕФ” университетларда ўқитиш сифатини баҳолаш тизимида жорий йилда “кумуш” даражасида, яъни жуда юқори сифатли деб баҳоланган.
