"Женоа" сафига ўтган Элдор Шомуродов билан катта интервью

Элдор Шомуродовнинг Италияга кўчиб ўтиши ортда қолган трансфер ойнасининг энг кутилмаган воқеаларидан бири бўлди. Сентябрь ойининг охирида «Женоа» «Ростов»га таклиф билан чиқди, бир неча кундан сўнг эса бу курашга «Верона» ва «Фиорентина» ҳам қўшилди. Табиийки, рақобатдан ғолиб чиқиш учун генуяликлар таклифни яхшилашга мажбур бўлди ва якунда Элдор трансферини амалга оширишга эришди.

Россиянинг Sport24 нашри Элдор Шомуродов билан интервью уюштириб, ундан «Ростов»даги мураббийи Валерий Карпин, болалиги ва амалга ошган орзулари ҳақида сўради. «Дарё» эса ўқувчиларга мазкур интервьюни ўзбек тилида тақдим этади.

— Шартнома имзолагандан сўнг терма жамоага ихтиёрига қўшилгандингиз. Ҳозир қаердасиз?

— Истанбулдаман, аэропортда. «Женоа» федерацияга мурожаат қилиб, тезроқ жамоага қўшилишим ва кундалик масалаларни ҳал қилишим учун мени қўйиб юборишни сўради. Мисол учун турар жойни ижарага олиш масаласи. Бунга имконият яратиб бергани учун Вадим Абрамов ва бутун мураббийлар штабидан миннатдорман. Албатта, агар расмий ўйинлар бўлганида, эрта кетиш ҳақида гап-сўз ҳам бўлмасди.

— Сиз ва «Женоа». Бу қандай содир бўлди?

— Ҳаммаси жуда тез содир бўлди. Қаҳҳор Мўминов (Элдорнинг агенти) қўнғироқ қилиб, шундай вариант борлиги ва уни кўриш чиқиш кераклигини айтди. Мен дарҳол рози бўлдим. Боиси болалигимдан Европада ўйнашни орзу қилардим. Бошидан бунга интилардим. Қайси мамлакат ёки жамоада бўлишининг аҳамияти йўқ, шунчаки ўзимни ўша ерда синаб кўришни ва нималарга қодирлигимни кўришни хоҳладим.

— Кўпчилик сўнгги паллагача «Манчестер Юнайтед» ва «Барселона» каби жамоалардан таклифларни кутади. Уларнинг айтишича, топ бўлмаган клубга боришдан маъни йўқ ва ундан кўра Россияда қолган яхшироқ.

— Топ клублар таклифини кутишдан фойда йўқ. Сиз фақат вақтингизни йўқотасиз, холос. Мен ҳам «Ростов»да қолишим мумкин эди, менга у ерда ҳамма нарса ёқар ва жуда қулай эди. Аммо Европа ҳақидаги ўйлар миямда азалдан тўпланиб келган. Шу тариқа имконият пайдо бўлиши билан унга рози бўлдим.

— Сўнгги дақиқаларда «Верона» ва «Фиорентина» сизни ўз сафига қўшиб олмоқчи эканлиги ҳақида маълумотлар пайдо бўлди. Сиз ушбу вариантларни кўриб чиқдингизми ёки бошидан «Женоа»га эътибор қаратганмидингиз?

— Бу ҳақида интернет орқали билдим. Ўша пайтда «Женоа» билан музокаралар якунланганди, биз сўнгги деталларни муҳокама қилаётгандик. Бошқа вариантлар ҳақида ўйламаётган ҳам эдим.

— Ушбу ёзда сизда бошқа таклифлар ҳам бормиди?

— Испаниядан, Бельгиянинг «Генк»идан таклифлар бўлди. Бунгача, йил бошида «Штутгарт» (Германия — «Дарё») варианти ҳам бор эди.

— «Женоа» таклифи пайдо бўлганида Карпин нима деди?

— Мен дарҳол унга ўзимни синаб кўрмоқчи эканлигимни айтдим. У эса мени футболчи сифатида тушунишини, лекин мураббий сифатида кетишимни хоҳламаслигини ва «Ростов»да керак эканлигимни айтди. Шунингдек, у агар раҳбарият трансферни маъқулласа, бунга аралашмаслигини ваъда қилди. У ва клубдан орзумни тушунгани учун жудаям миннатдорман.

— Хайрлашув видеосида Карпин сизга «йиғлама» деди. Айтинг-чи, ростанам йиғламадингизми?

— Тан оламан, кўз ёшларимни тийиб тура олмадим. Бир томондан, орзуларим амалга ошаётганди, бошқа томондан эса кетиш жуда қайғули бўлди.

— Instagram’да Карпин: «Арзимайди, қийшиқоёқ», – деб ёзганига қандай муносабат билдирдингиз?

— Жуда яхши қабул қилдим. Бу ҳазил эканлигини тушундим. Машғулот пайтида мен ундан доимо шундай нарсаларни эшитганман, бу одатий ҳол. Карпин билан доимо яхши муносабатда бўлганмиз. Масалан, кетишимдан олдин Валерий Георгич кулиб менга шундай деди: «Сен, қийшиқоёқни ким ҳам бунча пулга оларди».

— «Спартак»да кўпчилик Карпиннинг ҳазилларидан ранжирди.

— Мен ҳар доим ҳазилга ижобий муносабатда бўлганман. Аммо Георгич билан кўпинча жиддий, ҳатто қаттиқ суҳбатлар бўларди. Мен уни ҳар доим ҳақиқатни айтгани учун жуда ҳурмат қиламан. Мен ҳатто жавоб беролмасдим, чунки тушунардимки, Карпин ўзи ҳам футболчи бўлган, агар у бирон бир нарсани маслаҳат берса, уни эшитиш ва сўраганини қилиш лозим.

— Бир йил олдин сиз у баҳслашган экансиз: агар 4 та учрашувда 3 та гол ура олмасангиз, сочингизни калга олдирардингиз, шундайми?

— Ҳа шундай (кулади). Гарчи ўзимни сочсиз қолишга руҳан тайёрлаган бўлсам-да, ғолиб бўлдим.

— Карпин қандай шартни бажариши керак эди?

— Ҳеч қандай (кулади). У шунчаки Ҳорикка (Ҳорен Байрамян «Ростов» футболчиси – «Дарё») яқинлашди ва шундай деди: «Агар иккита гол урмасанг, сочингни олиб ташлайсан». Кейин эса менга қараб: «Сен эса учта урасан», – деди.

— «Женоа»да 61-рақамни олдингиз. Бу Ростов вилоятининг минтақавий коди.

— Бу ғояни дўстим таклиф қилди. У шундай деди: «Агар ҳали рақам танламаган бўлсанг, 61-рақамни ол, бу бизнинг минтақамизнинг кодидир, ростовлик мухлислар бундан хурсанд бўлади». «Женоа»да барибир 14-рақам банд экан, шунинг учун «Ростов» ва клуб мухлисларига миннатдорчилик билдиришни маъқул кўрдим.

— Аввалроқ сиздан Роналдудан кўпроқ гол урасизми, деб сўрашди. Планкани бироз туширамиз: Миранчукдан (Россиялик футболчи, ёзда Москванинг «Локомотив» клубидан «Аталанта»га ўтди) кўпроқ гол урасизми?

— Эшитинг, гол уришдан аввал рақобатда ғолиб чиқиш керак. Менинг биринчи вазифам – таркибда ўз ўрнимни эгаллашдир. Голлар сонига эса кейинроқ аниқлик киритамиз.

— Миранчук билан ёзишмадингизми?

— Ростини айтсам, у билан таниш эмасман. Аммо бу ерда, эҳтимол, учрашишимиз мумкин. Алексей агентлар орқали менга SMS юборди. Бу ёқимли бўлди.

— Айтайлик, «Зенит» «Женоа»дан яхшироқ шартнома таклиф қилганида, барибир Италияга кетардингизми?

— Мен барибир кетган бўлардим, чунки бошиданоқ агентимга фақат Европага кетишимни айтганман. Бунгача ҳам узоқ вақт давомида Қатар, Саудия Арабистони ва Хитой клубларидан вариантлар бор эди, лекин уларни кўриб ҳам чиқмадим. Мен учун пул асосий нарса эмас.

— «Женоа»да маошингиз «Ростов»дагига қараганда кўпми?

— Ҳа.

— Италияликлар саккиз ой ичида учта гол урган ҳужумчини сотиб олганидан кўпчилик ҳайрон бўлди. Самарадорлик нима сабабдан тушиб кетди?

— Оҳ, бу жуда қийин савол. Нима десам ҳам, бу баҳона ва ўзимни оқлаш бўлиб кўринади. Менимча, карантин таъсир қилди. Бизни хонага қамаб қўйишди ва ҳеч қаерга чиқишга рухсат беришмади – фақат тренажёр велосипедида ишладик ва пресс машқларини бажардик. Бу ҳар кимга ҳар хил таъсир кўрсатди: кимдир тезда жисмоний ҳолатини тиклаган бўлса, мен учун жуда узоқ вақт кетди.

— Карпин бунга сизнинг уйланганингизни сабаб қилиб кўрсатганди.

— Ҳамма уйланади-ку! Агар шундай бўлса, ҳамма секинлашиши керак (кулади). Менимча, бу таъсир қилмайди.

— Уйланишдан олдин Омина (Элдорнинг рафиқаси) билан қанча учрашдингиз?

— Икки ой.

— Оҳо...

— Ҳа. Уйланиш вақти келди деб қарор қилдим. Келин қидирдим ва мен уни топдим.

— Европани орзум деб айтдингиз. Болалигингизда Италияда ўйнайман деб тасаввур қилганмидингиз?

— Орзу қилишим мумкин эди, бироқ тасаввур қила олмасдим. Яқин вақтгача Россия чемпионатининг юлдузларини ҳам фақат телевизорда кўрардим. Эсимда, «Ростов»га келишим билан мени «Зенит»га қарши ўйинда туширишган.Ўшанда Бранислав Иванович «Зенит»да ўйнарди. Болалигимдан «Челси»нинг мухлисиман ва унинг «кўк»лар сафидаги ўйинларини телевизорда томоша қилардим.

— А Серияни ҳам томоша қилармидингиз?

— Тўғрисини айтсам, камдан кам футбол томоша қиламан. Фақат Чемпионлар Лигаси ёки «Челси» ўйинларини кўраман.

— Қандай қилиб футбол ўйнашни бошлагансиз?

— Оилам футбол оиласи. Дадам, икки амаким ва акам футболчи бўлган. Бобом эса мураббий. Дадам ҳам ҳужумчи эди. Эсимда йўқ, лекин у яхши ўйнаган дейишади. Афсуски, жароҳатлар туфайли фаолиятини эрта якунлаган. Амаким «Насаф» билан ОФК Кубогини, «Бунёдкор» билан эса Ўзбекистон Кубогини қўлга киритган. Мен олти ёшимдан машқ қилишни жуда хоҳлардим, лекин улар фақат биринчи синфдан бошлаб рухсат беришган. Мен етти ёшга тўлгунча кутишим керак эди. 12 ёшимда эса мени «Машъал» академиясига олиб боришди. Бу Ўзбекистондаги биринчи рақамли академия.

— «Челси»га муҳаббатингиз қаердан пайдо бўлган?

— Очиғини айтсам, билмайман ҳам. Менимча, ҳаммаси болалигимда «Челси» формасини олиб беришганидан кейин бошланган. Фернандо Торрес ва Дрогбанинг ўйинларини ёқтирардим.

— Ўзбекистонда бир сафар Ривалдонинг қўлидан етаклаб чиққан экансиз.

— «Машъал» академиясида ўйнаганимда, амаким Илҳом асосий таркибда ўйнарди. Мен ҳар доим унинг қўлидан ушлаб майдонга чиқардим. Аммо бир сафар «Бунёдкор» футболчилари билан чиқишимиз керак бўлиб қолди. У ўша пайтда «Қурувчи» деб номланарди. Менга эса Ривалдо тушиб қолди. Роса ҳаяжонланганман, очиғи бунга ишона олмаганман.

— Ўзбекистондан Италияга учиб кетдингиз. Кейинги сафар келганингизда, ўзингиз билан қанча «Женоа» либосини оласиз?

— Оҳ, ҳатто тасаввур ҳам қила олмайман. Каттагина сумка олсам керак. Менимча, бу менинг қандай ўйнашни бошлашимга боғлиқ бўлади. Агар яхши ўйнасам, чамадон ҳам етмаса керак. Ёмон ўйнасам, ҳеч кимга менинг футболкаларим керак бўлмайди.