Ҳиндистоннинг Одиша штатида жазирама сабаб яна саккиз киши ҳалок бўлди

Ҳиндистон шарқидаги Одиша штатида ҳукумат маълумотларига кўра, 72 соат ичида камида саккиз киши қуёш уриши оқибатида ҳалок бўлди. Миллий метеорология хизмати жорий ҳафтада штатнинг айрим ҳудудларида иссиқ ҳаво давом этишини тахмин қилмоқда, дея хабар беради Reuters.

Ҳиндистон метеорология департаменти (IMD) минтақадаги ҳаво ҳарорати меъёрдан 4,5-6,4 даражага юқори эканлигини маълум қилди. Душанба куни Одиша шаҳри марказида, Бхубанешварда максимал ҳарорат 39°С қайд этилди.

Ҳиндистон ва Осиёнинг бир қанча бошқа қисмларида ғайриоддий иссиқ ёз кузатилмоқда, олимлар фикрича, бу тенденция инсон томонидан қўзғатилган иқлим ўзгариши билан кучаймоқда. Метеорология хизмати яқин кунларда шимолий ва шарқий Ҳиндистоннинг айрим ҳудудларида иссиқ об-ҳаво шароити сақланиб қолишини тахмин қилмоқда.

Аввалроқ Ҳиндистонда жазирама туфайли уч кун ичида 50 дан ортиқ киши ҳалок бўлгани хабар қилинганди. Шунингдек, май ойи охирида Ҳиндистон пойтахти Деҳлида янги рекорд даражадаги ҳаво ҳарорати қайд этилди ва у 49,9°С га етди.