Фуқароларни Жанубий Корея, Англия ва Япония давлатларига ишга жўнатишни ваъда қилган шахслар ушланди
Бош прокуратура ҳузуридаги Департамент ҳамда ДХХнинг Жиззах вилояти бошқармалари томонидан муқаддам фирибгарлик жинояти учун судланган М.Н. фуқаролар Г.А. ва К.Ў.нинг ишончига кириб, уларни гўёки Миграция хизматида ишловчи танишлари ёрдамида Корея Республикасига ишга жўнатиш эвазига 6 400 АҚШ долларини олган вақтида ушланган.
Департамент ҳамда ДХХнинг Мирзо Улуғбек тумани бўлимлари томонидан эса фуқаролар А.Ш. ва К.Н. фуқаро Э.Х.нинг ишончига кириб, уни гўёки Миграция хизматида ишловчи танишлари ёрдамида Англияга ишга жўнатиш ва ҳужжатларини расмийлаштириб бериш эвазига 1 000 АҚШ долларини олган вақтларида ушланган.
Департаментнинг Марғилон шаҳар бўлими томонидан ўтказилган терговга қадар текширувда, фуқаро М.А. фуқаролар И.А. ва У.И.нинг ишончига кириб, уларни Япония ёки Корея Республикасига ишга жўнатиш эвазига жами 4 850 АҚШ долларини фирибгарлик йўли билан қўлга киритгани аниқланиб, ушбу пуллар ҳисобидан 400 АҚШ долларини қайтаргани процессуал тартибда расмийлаштирилган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
