Франциянинг собиқ президенти Николя Саркози бир йиллик қамоқ жазосига ҳукм қилинди

Париж апелляция суди телефон тинглаш иши бўйича қарор чиқарди. Аммо у жазони қамоқда эмас, уйда ўтайди. Саркозига электрон билагузук кийилади, деб хабар берди BFMTV.

2014 йилда Саркози ўз адвокати орқали Кассация суди ходимига Монако князлигида лавозим олишда ёрдам беришга ваъда берган эди.

Бунинг эвазига собиқ президент президентлик сайлови кампаниясини ноқонуний молиялаштириш бўйича терговнинг бориши ҳақида маълумот беришни талаб қилди.

Николя Саркози реал муддатга ҳукм қилинган биринчи Франция президенти бўлди.