Дубайга фоҳишалик билан шуғуллантириш учун аёл сотган судланувчига ҳукм ўқилди

“Пул бор-йўғи бир восита. Улар сизни истаган жойингизга элтади, лекин йўлнинг йўналишини ўзингиз танлашингиз керак”, деган эди америкалик файласуф Айн Рэнд. Муқаддам бир неча бор судланиб, бундан тўғри хулоса қилиш ўрнига, мўмай даромад топишни мақсад қилган “қаҳрамон”имизнинг танлови эса қинғир йўлдан юришда тўхталди.

42 ёшли Дилноза (исми ўзгартирилган) 2013 йил 6 октябрь куни Хулкарой ва бошқа шахслар билан олдиндан тил бириктиради. Улар таниши Лазокатхонни БАА давлати Дубай шаҳрида маоши катта бўлган ишга жойлаштириб қўйишни айтиб, қўйнини пуч ёнғоққа тўлдиришади. Аслида эса уни БАА давлатида фоҳишалик билан шуғуллантириш мақсадида ёллашганди. Жабрланувчи Лазокатхонни Хулкаройнинг кўрсатмаси асосида 2013 йилнинг октябрида Андижон вилояти орқали Қирғизистонга ўтказишган. Қирғизистон Республикаси ҳудудида уни бошқа шахс кутиб олиб, Лазокатхонга берилган фуқаролик паспортида дунёнинг барча мамлакатларига чиқиш ҳуқуқини берувчи “рухсат ёзуви” – виза стикерини расмийлаштирилмаганини била туриб, белгиланган чет элга чиқиш тартибини бузади. Аёлни 2013 йил 12 октябрь куни “Бишкек-Дубай” йўналишидаги авиа рейс билан БАА давлатига қонунга хилоф равишда юборган. Уни Дубай шаҳрида Хулкарой кутиб олиб, фуқаролик паспортини олиб қўйган ҳолда бошқа шахслар билан 2014 йил 15 январь кунига қадар мажбуран фоҳишалик билан шуғуллантирган.

Бундан ташқари, Дилноза виза стикерини расмийлаштирмай, Президентнинг 2017 йил 16 август кунги “Ўзбекистон Республикаси фуқароларининг хорижга чиқиш тартибини такомиллаштиришга доир чора-тадбирлар тўғрисидаги”ги ПФ-5156 сонли фармони 3-банди талабларига риоя қилмасдан белгиланган чет элга чиқиш тартибини такроран бузган. Аниқроғи, Украина давлати орқали 2013 йил 3 декабрь куни БАА давлатига қонунга хилоф равишда борганлиги аниқланиб, мазкур ҳолат юзасидан тегишли ҳужжатлар расмийлаштирилган.

“АЙБИМГА ИҚРОРМАН...”

Судланувчи Дилноза судда айбига қисман иқрор бўлган...

— Ҳақиқатдан ҳам 2013 йилнинг сентябрида Фарғона вилоятида Лазокат билан танишиб қолганман. У турмушидан ажрашганини ва шароити оғирлигини, бирор яхшироқ иш бўлса ишлашини маълум қилган. Унга Дубайда танишим Хулкарой фоҳишалик билан шуғулланишини, у ҳам унинг олдига борган ҳолда фоҳишалик қилиб яхши пул топиши мумкинлигини таклиф қилганман. Бундан ташқари, унга ўзим ҳам Хулкаройнинг олдига ишлаш учун бормоқчилигимни, бироқ фуқаролик паспортимни алмаштириш учун берганим сабабли бирга бора олмаслигимни тушунтирганман. Бола парваришлаш билан шуғулланиши ҳақида айтмаганман. 2013 йил 6 октябрь куни Лазокатдан Дубайга ишга бориш ёки бормаслигини сўраганимда, чипта сотиб олиш учун пули йўқлигини айтди. Йўл харажатларини барчасини танишим Хулкаройнинг ўзи қоплашини, Дубай шаҳрига борганидан сўнг ишлаб қайтаришини айтдим. Шундан сўнг Лазокат рози бўлди ва фуқаролик паспортини БАА давлатига кириш учун “виза”ни расмийлаштириш мақсадида берди. Хулкаройга Лазокатнинг паспорт нусхасини факс орқали юбордим. Орадан бироз вақт ўтганидан сўнг Лазокатнинг номига БАА давлати Дубай шаҳрига бориш учун виза чиқди. Бу ҳақда Лазокатга маълум қилдим.

Оилавий шароитим оғирлиги сабабли пул топиш мақсадида виза стикерини расмийлаштирмай, 2013 йил декабрда Украинанинг Киев шаҳри орқали БАА давлатининг Дубай шаҳрига борганман. Лазокат Хулкаройни кутиб олган ва у билан 2014 йилнинг июнига қадар фоҳишалик билан шуғулланган. 2014 йил июнда БАА давлатидан Туркиянинг Истанбул шаҳрига бордим. У ерда 2014 йилдан 2020 йилга қадар қадоқловчи бўлиб ишладим. 2020 йилнинг январида Тошкентга учиб келдим. Чегара назорати ходимлари фуқаролик паспортимни текшириб кўриб, стикер рухсатномасини олмасдан Украина давлати орқали БАА давлати ноқонуний борганимни ва қидирувда эканимни айтишди. Нима сабабдан Лазокат менинг устимдан ариза ёзганини ва унга қарши кўрсатмалар бераётганини изоҳлаб бера олмайман. Менга 400 АҚШ долларини Хулкарой ёрдам тариқасида юборган. Бу пулни Лазокатни топиб берганим учун олмаганман. Ҳозирда қилган ишимдан чин кўнгилдан пушаймонман. Айбимга иқрорман...

“БАА ДАВЛАТИГА ДИЛНОЗАНИНГ ГАПЛАРИГА ИШОНГАНИМ УЧУН БОРГАНМАН”

Жабрланувчи Лазокатхон судда қуйидагиларни баён қилган...

— Ҳақиқатдан ҳам 2013 йилнинг сентябрида Фарғона вилояти Қува шаҳрида Дилноза билан танишиб қолганман. У билан телефон орқали мулоқот қилиб турганман. У менга БАА давлатида ишлаб келиб, икки хонали уй олганини айтган. “Агар хоҳласангиз сизни ҳам Дубай шаҳридаги танишларимнинг олдига ишлаш учун юборишда ёрдам беришим мумкин”, деган. Бундан ташқари, Дилноза Дубайда Хулкарой исмли таниши борлиги, у барча йўл харажатларини қоплаган ҳолда Дубайга олиб боришини ва у ерда маҳаллий аҳолининг болаларига қараш билан шуғулланишимни айтган. Дилноза билан бирга БАА давлатига боришга рози бўлганман. Сўнг у БАА давлатига бориш учун чипта ҳамда мазкур давлатга кириш учун виза расмийлаштириш учун фуқаролик паспортини олган. Орадан бироз вақт ўтганидан сўнг Дилноза билан интернет орқали БАА давлатида танишлари билан гаплашганман. Улар мени кўриб, бир қанча маълумот сўрашган. Кейинги кун Дилноза менинг олдимга келди ва фуқаролик паспортимни бериб, танишлари менга қўнғироқ қилишини айтди. Кейин Хулкарой билан гаплашдим ва унинг кўрсатмасига асосан Қирғизистон орқали 2013 йил 12 октябрь куни БАА давлатига бордим. У ерда мени Хулкарой кутиб олди ва мени Озарбайжон миллатига мансуб аёлга ташлаб кетди. У аёл менга қилган харажатларини чиқариб олиш учун фуқаролик паспортимни олиб қўйди ва 2014 йилнинг январига қадар мажбуран фоҳишалик билан шуғуллантирди. У аёлга фоҳишалик қилиб, 8000 АҚШ доллар пул ишлаб берганман. Дилноза мени топиб бергани ва Дубайга юборгани учун унга 400 АҚШ доллари жўнатганини маълум қилди. Дубайга виза расмийлаштириш учун паспортимни берган вақтимда банкдан 400 АҚШ доллари миқдорида пул олганини кўрганман. Дилноза пулни йигити юборганини айтиб алдаган. БАА давлатига Дилнозанинг гапларига ишонганим учун борганман.

Ғафур Амонов, Тошкент шаҳар судининг жиноят ишлари бўйича судьяси:

— Судланувчи ЖК 135-моддаси 2-қисмининг “е” “з” “и” бандлари, 223-моддаси 2-қисмининг “б”, “в” бандларида назарда тутилган жиноятларни содир этганликда айбли деб топилди. ЖКнинг 59-моддаси тартибда тайинланган жазоларни қисман қўшиш йўли билан узил-кесил 5 йил 1 ой муддатга озодликдан маҳрум қилиш жазоси тайинланди.

ЖКнинг 62-моддаси талабларига асосан судланувчининг 15 кун дастлабки қамоқда сақланган ҳар бир кунини озодликдан маҳрум қилиш жазосининг бир кунига тенглаштириб ҳисоблаб, тайинланган жазодан 15 кунни чегириб, 5 йил 15 кун озодикдан маҳрум қилиш жазоси қолдирилди.

ЖКнинг 72-моддасига асосан тайинланган жазо шартли ҳисобланиб, судланувчига 1 йил синов муддати белгиланди.