Бухоро вилоятида 6 751 дона истеъмолга яроқсиз алкоголь маҳсулотлари тўхтатиб қолинди
Бош прокуратура ҳузуридаги Департаментнинг Ғиждувон тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда “Тошкент-Бухоро” йўналишида ҳаракатланиб келаётган “Isuzu” русумли юк автомашинаси тўхтатилиб кўздан кечирилганда, фуқаро Ш.А. умумий баҳоси 192 млн сўмлик жами 6 751 дона қалбаки акциз маркали алкоголь маҳсулотларини Ғиждувон туманида ўтказиш мақсадида олиб келганлиги аниқланиб, ушбу алкоголь маҳсулотлари ашёвий далил сифатида олинган.
Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят иши қўзғатилиб, тергов ҳаракатлари ўтказилмоқда.
