Бу йил “Фукусима-1” атом электр станциясининг миллион тонна ифлосланган суви Тинч океанига ташланади
2023-йилда “Фукусима-1” атом электр станциясининг миллион тонна ифлосланган суви Тинч океанига ташланади. Бу ҳақда Япония Вазирлар Маҳкамаси бош котиби Хироказу Матсуно бугун, 13 январь куни ўтказилган матбуот анжуманида маълум қилди.
Бош котиб 2023-йилнинг баҳори ёки ёзида Фукусима-1 атом электр станциясидан ифлосланган сувни тўкишни бошлаш режаларини маълум қилди.
Унга кўра, Япония ҳукумати икки йил аввал ифлосланган сувни Тинч океанига ташлашга қарор қилган. Ўтган йили ушбу жараённинг бошланиши 2023-йилга мўлжалланганлиги эълон қилинган эди. Бироқ бу қарор кўплаб қўшни давлатлар, жумладан, Хитой ва Жанубий Корея, шунингдек, айрим халқаро ташкилотларда хавотир уйғотди.
Япония расмийларининг таъкидлашича, энди бу сувни филтрлашдан сўнг океанга оққизиш хавфсиз. Атом энергияси бўйича халқаро агентлик ҳам бундай оққизиш хавфсиз эканлигини маълум қилди.
Шунингдек, атом электр станциясидан сувни тўкиш унинг бинолари ва реакторларининг бузилиши учун зарур бўлиб, бу бир неча ўн йиллар давом этиши мумкин.
Эслатиб ўтамиз, Японияда рўй берган зилзила ва ундан кейин содир бўлган цунамидан сўнг 2011-йилнинг 11-мартида Фукусима-1 АЭСда авария содир бўлган. Табиий офатлар натижасида 16 мингга яқин одам ҳалок бўлган. Юз минглаб японияликлар ўз уйларини ташлаб кетишга мажбур бўлган.
