«АЖРАШМАЙМАН» ДЕСА, АРИЗАМ ҚАНОАТЛАНТИРИЛМАЙДИМИ?

— Собиқ хотиним билан икки йилдан бери бирга яшамаймиз. Бундан ярим йил олдин уйландим. Биринчи турмушим билан расман ажрашиб, иккинчиси билан расман никоҳдан ўтиш учун судга ариза бергандим. Лекин собиқ хотиним «ажрашмайман», деяпти. Суд шуни деб муҳлат берди. Кейингисида ҳам «ажрашмайман», деса, аризам қаноатлантирилмайдими? Ахир бошқа оилам бор-ку?
Исми сир тутилди.

Жасур Норқобилов, фуқаролик ишлари бўйича Мирзо Улуғбек туманлараро суди судьяси:
— Оила кодексининг 40-моддасига мувофиқ, никоҳдан ажратиш ҳақидаги ишлар суд томонидан Фуқаролик процессуал кодексида даъво ишларини ҳал қилиш учун белгиланган тартибда кўриб чиқилади. Суд ишнинг кўрилишини кейинга қолдириб, эр-хотинга ярашиш учун олти ойгача муҳлат тайинлашга ҳақли. Суд эр-хотинга ярашиш учун муҳлат тайинлаб, ишнинг кўрилишини кейинга қолдирган тақдирда, эр-хотиннинг бирга яшаш жойидаги фуқаролар йиғинининг яраштириш комиссиясини, агар улар бирга яшамаётган бўлса, ҳар бирининг яшаш жойидаги фуқаролар йиғинининг яраштириш комиссиясини эр-хотинни яраштириш бўйича тегишли чоралар кўриш учун уч кундан кечиктирмасдан ёзма равишда хабардор қилиши керак.
Оила кодексининг 41-моддасига кўра, агар суд эр ва хотиннинг бундан буён биргаликда яшашига ва оилани сақлаб қолишга имконият йўқ деб топса, уларни никоҳдан ажратади.
Олий суд Пленумининг 2011 йил 20 июлдаги “Судлар томонидан никоҳдан ажратишга оид ишлар бўйича қонунчиликни қўллаш амалиёти тўғрисида”ги 6-сонли қарорининг 16-бандида тушунтирилишича, никоҳдан ажратиш тўғрисидаги талаб, фақат, эр-хотин бундан буён бирга ҳаёт кечиришларининг ва оила батамом бузилганлиги сабабли уни сақлаб қолишнинг иложи йўқлиги аниқланган ҳолдагина қаноатлантирилиши лозим.
Мурожаатингизда қайд этилишича сиз никоҳдан ажратиш ҳақида фуқаролик ишлари бўйича судга мурожаат қилгансиз ва суд томонидан эр-хотинга ярашиш учун муддат тайинланган.
Юқоридаги қонун талаби ва Пленум қарори тушунтиришлари талабидан келиб чиқиб, суд эр-хотинни бундан буён бирга ҳаёт кечиришларининг ва оила батамом бузилганлиги сабабли уни сақлаб қолишнинг иложи йўқ деб ҳисобласа, ўртадаги никоҳни бекор қилиш ҳақида ҳал қилув қарори қабул қилиши мумкин.