Xitoy Tayvan bilan tinch yo‘l bilan birlashish tarafdori, ammo kuch ishlatishni istisno qilmaydi

Xitoy mudofaa vaziri Li Shanfu mamlakat materikni Tayvan bilan tinch yo‘l bilan birlashtirish tarafdori ekanini aytdi, biroq Pekin kerak bo‘lsa, kuch ishlatishni istisno qilmaydi.

Bu haqda u Singapurda bo‘lib o‘tgan "Shangri-La Dialogue" xavfsizlik anjumanida aytib o‘tdi.

“Xitoy qayta birlashishi kerak va bo‘ladi. Bu xalqning intilishlari va zamonamiz tendensiyasiga mos keladi. Biz tinch yo‘l bilan birlashish istiqbollari uchun chin dildan intilamiz va buning uchun bor kuch-g‘ayratimizni sarflaymiz, biroq kuch ishlatishdan voz kechishga va’da bermaymiz”, — dedi Li Shanfu.

Agar kimdir Tayvanni Xitoydan ajratishga jur’at etsa, Xitoy armiyasi bir soniya ham ikkilanmaydi, dedi vazir.

"Biz dushmanlardan qo‘rqmaymiz va qanday xarajat bo‘lishidan qat’i nazar, milliy suverenitet va hududiy yaxlitlikni qat’iy himoya qilamiz", dedi u.

Tayvan bo‘g‘ozidagi keskinlikning asl sababi Taypey ma’muriyatining chetdan yordam olishga urinishlaridir, dedi Li Shanfu va ba’zi xorijiy kuchlar Tayvan orqali Xitoyni tiyib turishga harakat qilmoqda.