Vazir Fidan: Rossiya va Ukraina yo‘qotishlar ko‘lamini tushunmayapti

Turkiya tashqi ishlar vaziri Hoqon Fidan Anqara Rossiya-Ukraina urushini hal qilishda vositachilik rolini o‘ynashga tayyor, biroq tomonlar o‘zaro kelishuvga erishish sharti bilan, dedi.

CNN Turk telekanaliga bergan intervyusida u Turkiya ishtirokidagi “oltin tamoyil” Kiyev va Moskvaning o‘t ochishni to‘xtatish haqidagi kelishuvi ekanligini ta’kidladi.

Fidanning so‘zlariga ko‘ra, har ikki davlat ham “urush charchoqlari” holatida va ular ko‘rgan yo‘qotishlar ko‘lamini hali to‘liq anglab yetmagan. U o‘t ochishni to‘xtatishga erishish boshqa qadamlardan oldin bo‘lishi kerakligini ta’kidlab, Turkiya tinchlik muzokaralarida, jumladan kuzatuvchi sifatida ishtirok etish tajribasiga ega ekanligini eslatdi.

Vazir, shuningdek , AQShning mojarodagi hozirgi pozisiyasi urushning avvalgi bosqichiga nisbatan o‘zgarganini ta’kidladi. " Avvalroq Vashington eskalasiyaga harakat qilgan, Yevropa esa bunga ergashdi. Endi Tramp kelishi bilan yondashuv o‘zgarishi mumkin ", dedi u. Fidan fikricha, Tramp davrida AQSh va Rossiya o‘rtasida qarama-qarshilik yo‘qligi diplomatiya uchun yangi maydon ochmoqda.

Fidan, Turkiya qo‘shni va mintaqaviy o‘yinchi sifatida o‘z tajribasini har ikki tomon bilan baham ko‘rishda davom etishini va kerak bo‘lsa mintaqada barqarorlikni saqlashga hissa qo‘shishini ta’kidladi.